ԵՊՀ հրատարակչությունը լույս է ընծայել բանասիրական գիտությունների թեկնածու Մարիամ Հովսեփյանի «Արևմտահայ մամուլի պատմություն (1832-1915 թթ.)» դասախոսությունների ժողովածուն: Այն հրատարակվել է ԵՊՀ ժուռնալիստիկայի ֆակուլտետի գիտխորհրդի երաշխավորությամբ: Խմբագիրը ԵՊՀ ժուռնալիստիկայի ֆակուլտետի դեկան, բանասիրական գիտությունների թեկնածու, դոցենտ Նաղաշ Մարտիրոսյանն է:
Հայ մամուլի պատմության առանձին բաժին է կազմում արևմտահայ մամուլը: Այս հարուստ ու բազմազան մամուլի մասին ուսանողների գիտելիքներն առավել ամբողջական և ընդգրկուն դարձնելու նպատակով են գրվել արևմտահայ մամուլի պատմության (1832-1915 թթ.) մասին դասախոսությունները: Գրքում ամփոփ կերպով ներկայացված են արևմտահայ պարբերական մամուլի ինչպես հայտնի, այնպես էլ քիչ ուսումնասիրված այն օրգանները, որոնք լուրջ դերակատարություն են ունեցել մեր ժողովրդի կյանքում:
Արևմտահայ մամուլի պատմության (1832-1915 թթ.) դասախոսությունները ներկայացնում են արևմտահայ ավելի քան քսան պարբերականի խմբագիրներին, աշխատակիցներին և թղթակիցներին, դրանց հիմնական բաժիններն ու խորագրերը, որդեգրած ուղղվածությունը և խաղացած դերը հայ հասարակական-քաղաքական ու մշակութային կյանքում:
Գիրքը պատկերացում է տալիս մեր ժողովրդի համար էական ու վճռորոշ իրադարձությունների նկատմամբ այս կամ այն պարբերականի դրսևորած կեցվածքի և դիրքորոշման մասին: Այս տեսանկյունից են առանձնացված ու ներկայացված պարբերականների խմբագրականները և հրապարակախոսների ու վերլուծաբանների հոդվածները և հրապարակումները:
Այսպիսով` փորձ է արվել ամբողջապես և ոչ թե միայն որևէ կողմով ուսումնասիրել արևմտահայ պարբերականները: Դրանք 1832-1915 թթ. կտրվածքով ներկայացված են պոլսահայ, զմյուռնահայ և գավառահայ բաժինների ներքո: Դասախոսություններին կցված է բավական հարուստ օժանդակ մասնագիտական գրականության և մամուլի ցանկ: Այստեղ ընդգրկված մատենագիտական գրքերը, հոդվածները և ուսումնասիրությունները օգտակար կլինեն արևմտահայ մամուլի ուսումնասիրությամբ զբաղվող ուսանողների ու գիտաշխատողների կամ խնդրո առարկա ժամանակաշրջանի արևմտահայ մամուլի դասընթացը ներկայացնող դասախոսների համար:
Akunq.net
Leave a Reply