Դիարբեքիրի Սուրբ Կիրակոս հայկական եկեղեցում ապրիլի 5-ին Սուրբ Զատիկի կապակցությամբ ծիսական արարողություն է անցկացվել, որին մասնակցել են մեծ թվով հայեր:
Թուրքական մի շարք լրատվամիջոցների փոխանցմամբ՝ պատարագը մատուցող հոգևորականը հրաժարվել է օրհնել մուսուլման մի կնոջ:
Ֆադիմե Միրայ Աթաշ անունով մուսուլման մի կին ցանկություն է հայտնել օրհնություն ստանալ, սական, ըստ թուրքական աղբյուրների, հայկական եկեղեցում նրան մերժել են: Երբ կինը մոտեցել է հոգևորականին, վերջինս խնդրել է ցույց տալ խաչը, սակայն կինը նշել է, թե քրիստոնյա չէ, մուսուլման է, բայց ցանկանում է օրհնություն ստանալ:
Ավելի ուշ թուրք կինը մերժման մասին պատմել է թուրքական լրատվամիջոցներին, որոնք էլ ակտիվորեն տարածում են այս տեղեկատվությունը:
Նշվում է, որ պատարագից հետո եղել է հյուրասիրություն, որի ժամանակ պատարագին մասնակցածներն ու հյուրերը ներկված ձվերով մրցել են միմյանց հետ:
Նշենք, որ Դիարբեքիրի (Աղձնիք նահանգ) Սուրբ Կիրակոս եկեղեցին վերանորոգումից հետո բացվելուց ի վեր արդեն 3-րդ տարին անընդմեջ ընդունում է Սուրբ Զատիկի արարողակարգը: Այս տարի ևս պատարագին մասնակցել են ոչ միայն հայեր Թուրքիայի տարբեր շրջաններից, այլ նաև արտասահմանից:
Աղբյուր` Թուրքագիտական պորտալ
AllTurkey.am
Leave a Reply