Գերմանացի լրագրող. Թուրքիայի կառավարությունը փակ է համագործակցության համար

Եվրոպան պետք է Թուրքիայի հետ քննարկի հարցը, որ եթե այն ցանկանում է ընդգրկվել Եվրոպայում, ապա պետք է փոխի Հայոց ցեղասպանության հարցի շուրջ մտածելակերպը եւ գիտակցի իր մեծ սխալը: Այս մասին NEWS.am-ի թղթակցի հետ զրույցում հայտարարեց «Youth for media» եվրոպական ասոցիացիայի ղեկավար Ջոակիմ Մասհոլտը:

Նրա խոսքով, Թուրքիայի կառավարությունը փակ է եւ պատրաստ չէ համագործակցել այդ հարցի շուրջ: «Ես Հայաստան եմ եկել՝ Հայոց ցեղասպանության մասին ավելին իմանալու համար: Ես Գերմանիայից եմ: Մեր ասոցիացիան աշխատում է լրատվամիջոցների հետ: Մենք մտադիր ենք այդ հարցի շուրջ նախագծեր իրականացնել երիտասարդների հետ, քանի որ արեւմտյան երկրներում ոչ բոլորը գիտեն Հայոց ցեղասպանության մասին»,- նշեց Ջոակիմ Մասհոլտը:

Անդրադառնալով հարցին, թե ինչ կոչ կուղղեր Թուրքիայի կառավարությանը, որը շարունակում է ժխտել Հայոց ցեղասպանության փաստը, գերմանացի լրագրողը պատասխանեց, որ թուրք հասարակության մեծ մասը չի ցանկանում խոսել այդ մասին, սակայն մյուս մասը միանգամայն բաց է:

«Հուսով եմ՝ մենք կկարողանանք այդ մարդկանց համոզել խորացնել շփումները, սակայն թուրքական հասարակությունը շատ փակ է այդ հարցի համար: Գերմանիան նույնպես ցեղասպանություն է իրագործել՝ Հոլոքոստ, բայց գերմանացիները ներողություն են խնդրել: Կարծում եմ՝ դա լավ օրինակ է այլ երկրների համար»,- ընդգծեց «Youth for media» եվրոպական ասոցիացիայի ղեկավարը:

http://news.am/arm/news/258084.html