Հայոց ցեղասպանությունից 100 տարի անց հայաստանցի ուխտավորները հնարավորություն են ունենալու Սուրբ Զատիկը նշել Վանի Աղթամար կղզու Սուրբ Խաչ եկեղեցում: Այս մասին NEWS.am-ի թղթակցի հետ զրույցում ասաց «Նարեկավանք Տուր» ընկերության համահիմնադիր Արմեն Հովհաննիսյանը:
Արմեն Հովհաննիսյանի խոսքով՝ «Նարեկավանք Տուրը» Սուրբ Զատիկը Աղթամարի Սուրբ Խաչ եկեղեցում նշելու համար հատուկ ուխտագնացություն է կազմակերպում։ «Ապրիլի 5-ին ապահովելու ենք հայերի ներկայությունը Վանի Աղթամար կղզում։ Պատարագ չի լինելու, քանի որ Պոլսո հայոց պատրիարքարանը տարին մեկ անգամ է պատարագ մատուցում Սուրբ Խաչում՝ սեպտեմբերի 2-րդ կիրակի։ Պատարագ չի լինելու, սակայն աղոթք լինելու է»,-ասաց Արմեն Հովհաննիսյանը՝ շեշտելով, որ ապրիլին քիչ թվով հայեր են լինում Աղթամարում։
Նրա խոսքով՝ այդ ժամանակ Աղթամար կղզում կարելի է հիանալ ծաղկած նշենիներով եւ կղզու դիմաց դեռեւս ձյունածածկ Տավրոսի լեռնաշղթայով։
Արմեն Հովհաննիսյանը հիշեցրեց, որ Սուրբ Զատիկին ուխտագնացություն են կազմակերպում նաեւ Իրանում գտնվող Սուրբ Թադեի եւ Սուրբ Ստեփանոս Նախավկայի եկեղեցիներ:
http://news.am/arm/news/257884.html
Leave a Reply