Թուրքիան ստիպված է լինելու ընդունել Հայոց ցեղասպանությունը. թուրք լրագրող

Թուրքական Marksist.org կայքի լրագրող Աթիլլա Դիրիմը հերթական հրապարակման մեջ անդրադարձել է Հայոց ցեղասպանության թեմային եւ պնդել, թե Թուրքիան ի վերջո ստիպված է լինելու ընդունել Հայոց ցեղասպանությունը։

Թուրք լրագրողը, անդրադառնալով այս տարի Չանաքալեի միջոցառումներն ավելի ակտիվ իրականացնելու թուրքական իշխանությունների նախաձեռնություններին, նշել է, թե դա ունի երկու պատճառ՝ ազգայնականության թույնն ավելի շատ լցնել աշխատավորների եւ հալածյալների երակները եւ ամենակարեւորը՝ստվերել Հայոց ցեղասպանության 100-րդ տարելիցը։

«Հայոց ցեղասպանությունը Թուրքիայի պատմության առանցքային քարն է։ Երբ այդ քարը հանվի, ստերի հիման վրա կառուցված հսկա պատմություն կրող պատը փլվելու է եւ ցեղասպանություններով սնվող Թուրքիայի հանրապետության տիզերը մնալու են իրենց ստերի տակ։ Այդ տիզերն այս ամենը լավ գիտեն, դրա համար էլ սովորաբար մարտի 18-ին նշվող Չանաքալեի միջոցառումներն այս տարի ապրիլի 24-ին են նշելու՝ իրենց ամբողջ աշխարհի առաջ գցելով թշվառ ու ծիծաղելի վիճակում։

Բայց այդ ամբողջ ջանքերն ապարդյուն են։ Ինչքան էլ իրենք աշխարհում խայտառակվելու գնով փորձեն պատեպատ տալ, ապրիլի 24-ը Հայոց ցեղասպանության օր ճանաչող երկրների շարքն ավելանում է։

Թուրքիան ի վերջո մի կողմ է նետելու ստերը եւ առերեսվելու է պատմության հետ։ Թուրքիան ստիպված է լինելու ապրիլի 24-ն ընդունել Հայոց ցեղասպանության օր, իսկ Չանաքալեի ճակատամարտը ոչ թե հաղթանակ, այլ աղետ։

Մեր ձեռքում է Թուրքիայի հանրապետությանն այդ անխուսափելի վերջին մոտեցնել։ Մենք պետք է ոչ միայն ապրիլի 24-ին, այլ միշտ խոսենք Հայոց ցեղասպանության իրականությունից։ Եթե մարդկանց հասկացնենք, որ դա ճիշտն է, մեր մեջքին գտնվող խղճի բեռից ավելի շուտ կազատվենք»,-գրել է Աթիլլա Դիրիմը։

http://news.am/arm/news/257694.html