Թուրքիայի ընդդիմադիր Ժողովրդահանրապետական կուսակցության (ԺՀԿ –CHP) Ադանայի պատգամավոր Օսման Ֆարուք Լողօղլուն հայտարարել է, որ հայկական լոբբին ուժեղացրել է ԱՄՆ-ի կոնգրեսում ցեղասպանության վերաբերյալ որոշման ընդունմանն ուղղված աշխատանքները, և Թուրքիան այս առումով հայտնվել է անզոր վիճակում:
Ըստ թուրքական 5kitahaber.com լրատվական կայքի՝ ԺՀԿ պատգամավորը ընդգծել է, որ հայկական և հունական լոբբիստական ուժերն ԱՄՆ-ում գործում են Թուրքիայի դեմ: Դրա արդյունքում ապրիլի 24-ի նախաշեմին ինչ-որ մի հայամետ որոշմամբ Վաշինգտոնը կարող է վատ դրության մեջ գցել Թուրքիային:
Լողօղլուն հիշեցնելով, թե ժամանակին ինչպես էր ԱՄՆ-ի նախկին նախագահ Բիլ Քլինթոնը վերջին պահին հեռախոսազանգով միջամտել և կանխել կոնգրեսում Թուրքիայի դեմ բանաձևի ընդունումը, շեշտել է, որ երբեք հնարավոր չէ կանխատեսել ԱՄՆ-ի հետագա քայլերը:
«Եթե ապրիլի 24-ից առաջ ԱՄՆ-ի նախագահ Օբաման օգտագործի «մենք ճանաչում ենք ցեղասպանությունը» արտահայտությունը կամ կոնգրեսում որևէ նմանատիպ բանաձև ընդունվի, այդ դեպքում կփոխվեն նաև ԱՄՆ-ի դատարանների դիրքորոշումը: Միացյալ նահանգներ դատավորները հետևում են նախագահի պահվածքին և կոնգրեսի որոշումներին: Նրանք անմիջապես կբավարարեն հայերի ներկայացրած հայցերը: Թուրքիան ստիպված կլինի շատ մեծ փոխհատուցում վճարել, և հայերը կտիրանան ԱՄՆ-ում առկա Թուրքիայի ունեցվածքին: Վիճակը շատ ավելի ճգնաժամային է, քան թվում է»:
Լողօղլուն ուշադրություն է հրավիրել նաև այն հանգամանքի վրա, որ Թուրքիայի դեմ գործող հունական և հայկական լոբբիներին միացել է նաև հրեականը, մինչդեռ վերջինս նախկինում ավելի շատ թուրքամետ գործունեություն էր ծավալում: Ըստ պատգամավորի՝ հրեական լոբբիի դիրքորոշման փոփոխությունը լիովին հետևանք է Թուրքիայի իշխող Արդարություն և զարգացում կուսակցության (ԱԶԿ -AKP) վարած քաղաքականության:
Leave a Reply