Թուրքիան պետք է վերլուծի, թե ինչն է սխալ արել. Էդվարդ Նալբանդյան

Թուրքիան խախտեց pacta sunt servanda սկզբունքը: Այս մասին սլովենական «Dnevnik» օրաթերթին տված հարցազրույցում նշել է Հայաստանի ԱԳ նախարար Էդվարդ Նալբանդյանը՝ անդրադառնալով հայ-թուրքական հարաբերությունների նորմալացման հեռանկարին:

«Թուրքիայի հետ բանակցություններ սկսելը մեր նախագահի նախաձեռնությունն էր՝ ուղղված առանց որեւէ նախապայմանի հարաբերությունների կարգավորմանը: Մինչ դա մեր հարաբերությունները փակուղու մեջ էին: Մեր նախագահը հրավիրեց Թուրքիայի նախագահ Գյուլին` Հայաստանում ներկա գտնվելու ֆուտբոլային խաղին: Այս նախաձեռնությունը հայտնի դարձավ որպես «Ֆուտբոլային դիվանագիտություն»: Մենք վարում էինք շատ ինտենսիվ եւ դժվար բանակցություններ: 2009թ. հոկտեմբերին Ցյուրիխում մենք ստորագրեցինք երկու արձանագրություններ: Սակայն Թուրքիան պատրաստ չեղավ դրանք վավերացնելու եւ կյանքի կոչելու: Թուրքիան խախտեց pacta sunt servanda սկզբունքը: Այդ է պատճառը, որ միջազգային հանրությունը, աշխարհի շատ երկրներ, ասում են, որ գնդակը գտնվում է Թուրքիայի դաշտում»,-ընդգծել է նախարարը:

Նրա խոսքով՝ Թուրքիան վերադարձավ նախապայմանների լեզվին` փորձելով կապակցել ղարաբաղյան հիմնահարցի հանգուցալուծումը Հայաստան – Թուրքիա հարաբերությունների կարգավորման հետ: «Բազմաթիվ երկրներ ընդգծում էին, որ ցանկացած փորձ՝ կապակցելու այս երկու գործընթացները, կվնասի երկուսին էլ: Թուրքական կողմի հին նախապայմաններից մեկը, որը վերակենդանացվեց Ցյուրիխից հետո, վերաբերում էր Հայոց ցեղասպանության ճանաչմանը: Բայց Հայաստանը անվերապահորեն հայտարարել եւ հաստատել էր՝ մենք երբեք հարցականի տակ չենք դնի Հայոց ցեղասպանության փաստը եւ նրա միջազգային ճանաչման ու դատապարտման կարեւորությունը»,-ասել է Նալբանդյանը:

Հարցին, թե Ռուսաստանը, որպես Թուրքիայի բարեկամ, կարո՞ղ է այս երկխոսությունը կրկին տեղափոխել նախորդ փուլ, ՀՀ ԱԳ նախարարը պատասխանել է. «Առաջին հերթին Թուրքիայի կառավարությունը պետք է Թուրքիայի ժողովրդի բարեկամը լինի՝ գործի ի շահ իր ժողովրդի: Արդյո՞ք կարծում եք, թե Հայաստան – Թուրքիա հարաբերությունների կարգավորումը ավելի շատ է բխում այլ պետությունների շահերից, քան՝ Թուրքիայի եւ Հայաստանի: Իհարկե, այդ կարգավորումը համապատասպանում է թե՛ Հայաստանի, թե՛ Թուրքիայի, թե՛ տարածաշրջանի շահերին:

Բայց, ցավոք, Թուրքիան քաջություն եւ իմաստություն չունեցավ՝ վավերացնելու եւ կյանքի կոչելու համաձայնեցված եւ ստորագրված արձանագրությունները: Այսինքն՝ սա այն դեպքը չէ, երբ որեւէ մեկը պետք է ինչ-որ դերակատարում ունենա՝ առաջ մղելու Հայաստան – Թուրքիա հարաբերությունների կարգավորումը: Առաջին հերթին Թուրքիան պետք է վերլուծի, թե ինչն է սխալ արել: Դեռ այն ժամանակ ես զգուշացնում էի, որ Թուրքիան իր այս մոտեցմամբ իր հռչակած «զրո խնդիր հարեւանների հետ» քաղաքականությունը կվերածի «զրո հարեւանների առանց խնդիրների»: Այսօր բոլորը կիսում են այս տեսակետը»:

http://news.am/arm/news/256990.html