Այն բանից հետո, երբ լուրեր տարածվեցին, որ Ուելսի արքայազն Չարլզը ներկա է լինելու Գալիպոլիի ճակատամարտի զոհերի հիշատակին նվիրված միջոցառմանը, որը Թուրքիայի կառավարությունը որոշել է նշել ապրիլի 24-ին՝ ակնհայտորեն նպատակ ունենալով միջազգային հանրության ուշադրությունը շեղել Հայոց ցեղասպանության 100-ամյա տարելիցի միջոցառումներից, Հայ առաքելական եկեղեցու Իրաքի թեմի առաջնորդ, արքեպիսկոպոս Ավագ Ասատուրյանը նամակով դիմել է արքայազնին, հաղորդում է «Asbarez»-ը։

«Ապրիլի 24-ին՝ Հայոց ցեղասպանության 100-ամյա տարելիցին, Հայաստանի Հանրապետությունը պատրաստվում է կազմակերպել միջոցառում։ Նույն օրը  Թուրքիայի Հանրապետությունը որոշել է հիշել Գալիպոլիի ճակատամարտը, որի ժամանակ Օսմանյան կայսրությունը կռվել է Անգլիայի եւ նրա դաշնակիցների դեմ։ Անկասկած, այդ արարողությունը որեւէ առնչություն չունի Գալիպոլիի ճակատամարտի հետ։ Դրա նպատակն է ոչնչացնել ազգի մասին հիշողությունը»,- գրել է Ասատուրյանը։

Արքեպիսկոպոսը գրել է, որ արքայազնին որոշել է նամակ գրել, երբ իմացել է, որ Մեծ Բրիտանիայի արքայազնը հրաժարվել է մասնակցել Հայոց ցեղասպանության 100-ամյա տարելիցի միջոցառումներին, իսկ Գալիպոլիի արարողությանը սպասվում է բրիտանական կառավարության մասնակցությունը՝ բարձրագույն մակարդակով։

«Այն, ինչ զանգվածաբար իրականացվել է հայերի Ցեղասպանության ժամանակ՝ կտրելով մարդկանց կոկորդներն ու ողջ-ողջ այրելով մարդկանց, այսօր իրականացնում է «Իսլամական պետությունը»,- գրել է արքեպիսկոպոսը՝ արքայազնին առաջարկելով պատկերացնել, թե ինչ կլիներ, եթե 100 տարի անց Մեծ Բրիտանիայի վարչապետը ներկա գտնվեր այսօրվա «Իսլամական պետության» իրավահաջորդի կազմակերպած միջոցառմանը, եւ հույս հայտնելով, որ Մեծ Բրիտանիան կգործի իր արժեքներին համապատասխան։

http://news.am/arm/news/256543.html