Ստամբուլում բացված ցուցահանդեսում տեղ է հատկացվել հայոց այբուբենին և Ցեղասպանության թեմային

Թուրքիայում ընթանում է «Հարյուրամյակների հարյուրամյակը» ցուցադրությունը, որտեղ տեղ է հատկացվել նաև Հայոց ցեղասպանության թեմային:

Թուրքական «Ռադիքալ» պարբերականի փոխանցմամբ՝ Ստամբուլի կենտրոնում գտնվող «Սոլթ Բեյօղլու» սրահում բացված ցուցահանդեսը նվիրված է տարբեր իրադարձությունների 100-ամյակներին: Մասնավորապես, ցուցահանդեսում ներկայացված են ցուցանմուշներ, որոնք առնչվում են Դարդանելի (Գալիպոլիի) գործողության 100-րդ տարվան, Բալկանյան պատերազմին (100-ամյակը 2013 թվականին էր), Առաջին աշխարհամարտին (100-ամյակը 2014 թվականին էր), ինչպես նաև Հայոց ցեղասպանությանը: Ցուցահանդեսին ներկայացվել են նաև հայտնի թուրք գրողներ, գիտնականներ, որոնց ծննդյան 100-րդ տարին է լրացել վերջին տարիներին:

Ցուցահանդեսին մասնակցող Դիլեք Վինչեսթերն իր համար առանձնացված բաժնում ներկայացրել է հայոց այբուբենով իր աշխատանքը, որը ցուցադրության ուշադրություն գրավող ստեղծագործություններից է: Հեղինակն այս կերպ փորձել է հարյուր տարի առաջ այս հողերում օգտագործվող հայոց այբուբենը ներկայացնել այցելուներին:

«Հարյուրամյակների հարյուրամյակը» ցուցահանդեսը շարունակվելու է մինչ մայիսի 24-ը: