Բացառիկ համերգ Նոր Ջուղայում` նվիրված Հայոց ցեղասպանության 100-րդ տարելիցին

Մարտի 5-ին եւ 6-ին Ն. Ջ. Հայ Մ. Մ. «Արարատ» միության դահլիճում, Նոր Ջուղայի թեմի, Հայոց Ցեղասպանության 100-րդ տարելիցի Կենտրոնական հանձնախմբի Մշակութային միջոցառումների ենթահանձնախմբի նախաձեռնությամբ, տեղի ունեցավ «Արփա» նվագախմբի ելույթը` դոկտ. Արփի Բաբումյանի ղեկավարությամբ, այս մասին «Հայերն այսօրին» տեղեկացնում են Նոր Ջուղայի Ազգային առաջնորդարանից:
Հայոց ցեղասպանության 100-րդ տարելիցին նվիրված այս համերգին ներկա էին Սպահանի 5-րդ շրջանի քաղաքապետ Ճարտ. Ասառզադեգանը, Սպահանի արվեստի համալսարանի տնօրեն դոկտ. Թահեռին, Սպահանի պետական համալսարանի պատասխանատուներ, քաղաքական, կրթական, հասարակական եւ մշակութային այլ գործիչներ, ազգային մարմինների ներկայացուցիչներ եւ մեծ թվով հայ ու պարսիկ հայրենակիցներ:
Ծրագրի առաջին բաժնում ողջույնի եւ բարիգալստյան խոսքով հանդես եկավ օրվա հանդիսավար` Ռուբեն Խաչիկ Գրիգորյանը, ով անդրադառնալով Հայոց ցեղասպանության 100-րդ տարելիցին` կարեւորությամբ ընդգծեց, թե մեկ դար անցնելով այդ ահռելի ողբերգությունից` այն չի անհետացել համայն մարդկության հիշողությունից: Նա ցավով մատնանշեց այն իրողությունը, որ Թուրքիայի իրավահաջորդ պետությունները շարունակում են իրենց ժխտողական քաղաքականությունը, ինչպես նաեւ` կատարած հանցագործությունն ու դրա հետեւանքները լռության մատնելու փորձերը:
Ծրագրի շարունակության մեջ պարսիկ հաղորդավարուհու միջոցով մեկնաբանվեց Հայոց ցեղասպանության 100-րդ տարելիցի խորհրդանիշ` «անմոռուկ» ծաղկի եւ «Հիշում եմ եւ պահանջում» կարգախոսի իմաստը: Այնուհետեւ հանդիսատեսով լեցուն դահլիճում, հայ եւ պարսիկ երաժիշտների ու մեներգիչների կատարմամբ հնչեցին անվանի կոմպոզիտորներ ու երաժիշտներ` Կոմիտասի, Արա Գևորգյանի, Մոցարտի, Մեսչյանի, Ալբինոնի, Ժան Քլոդ Փեթի, Եսայու եւ Հայփեր Սոլի ստեղծագործությունները:
«Արփա» նվագախումբը անցյալի անվանի կոմպոզիտորների գործերի կատարումով վերաիմաստավորեց հայ ժողովրդի վերածննդի գաղափարը: Հատկանշելի է, որ պարսիկ երգիչների հայերեն երգերի բարձրակարգ կատարումը հիացմունքի պատճառ դարձավ հայ հանդիսատեսի մոտ:
Երաժշտությունների կատարմանը զուգահեռ հանդիսատեսին ներկայացվեց Հայոց ցեղասպանության եւ հայ ժողովրդի պահանջատիրության պատմությունը, ինչպես նաեւ` դրվագներ Կոմիտասի կյանքից ու գործունեությունից: Համերգի ընթացքում ցուցադրվեց պարսկերենի թարգմանված Անրի Վերնոյի «Մայրիկ» ֆիլմից հատվածներ, որը խոր ազդեցություն թողեց ներկաների վրա:
Այսպիսով, հնարավոր դարձավ արվեստի միջոցով պարսիկ հանդիսատեսին ցույց տալ հայ ժողովրդի մեկ դար առաջ ապրած ցավն ու տառապանքը եւ մեր պահանջի ձայնը լսելի դարձնել նրանց:
Վերջում օրվա հանդիսավարը գործադիր հանձնախմբի անունից երախտագիտության խոսք ուղղեց բոլոր նրանց, ովքեր իրենց բոլոր կարողությունը ի գործ դրին միջոցառումը լավագույնս իրականացնելու համար:
Hayernaysor.am