Հայ թեկնածուները կարող են առաջադրվել Թուրքիայի խորհրդարանական ընտրություններին. «Ակօս»

Թուրքիայի քաղաքական ուժերը ակտիվորեն նախապատրաստվում են ամռանը կայանալիք խորհրդարանական ընտրություններին։ Թուրքիայում լույս տեսնող «Ակօս» շաբաթաթերթն անդրադարձել է ազգությամբ հայ այն թեկնածուներին, որոնք կարող են առաջադրվել այս կամ այն կուսակցությունից։

Ժողովուրդների դեմոկրատական կուսակցություն
ԺԴԿ-ն այս շաբաթ ստացավ բոլոր դիմումները և այժմ քննարկում է, թե որ թեկնածուներն են առաջադրվելու ընտրություններին։ Սպասվում է, որ այս կուսակցությունից պատգամավոր առաջադրվելու ամենահավանական հայ թեկնածուն ԺԴԿ-ի կենտրոնական գործադիր խորհրդի անդամ Գարո Պալյանն է, որը, միևնույն ժամանակ, Ստամբուլի Յեշիլքյոյ թաղամասի հայկական նախակրթարանի տնօրենն է։
Բացի Պալյանից, «Ժողովուրդների դեմոկրատական» կուսակցությունունից կարող են առաջադրվել նաև Սասունի շրջանի Աջար գյուղի հայկական միության նախագահ և Մուշի հայկական միության երկրորդ նախագահ, ուսուցիչ Ֆիքրի Չալըշը և նախորդ ՏԻՄ ընտրություններին ԺԴԿ-ից մասնակցած Նվարդ Բաքըրջըօղլուն։

Ժողովրդահանրապետական կուսակցություն
ԺՀԿ-ի շուրջ 3 հազար թեկնածության թեկնածուների թվում միայն մեկ հայ է ընդգրկվել։ Խոսքը Ստամբուլի «Սուրբ Հակոբ» հիվանդանոցի հանրային կապերի պատասխանատու, քեմալական հայացքներով Թալին Էրգյունեշի մասին է, որը ցանկանում է իր թեկնածությունն առաջադրել հենց Ստամբուլից։

Արդարություն և զարգացում կուսակցություն
ԱԶԿ-ն ևս ստացել է բոլոր թեկնածուների դիմումները։ Թուրքիայի իշխող կուսակցությունում 6223 թեկնածության թեկնածու կա, որոնցից միայն երկուսն են հայեր։ Կուսակցությունը կարող է առաջադրել լրագրող Մարգար Եսայանի թեկնածությունը, որը ներկայումս աշխատում է իշխանամետ «Ենի Շաֆաք» պարբերականում, ինչպես նաև «Սուրբ փրկիչ» հայոց հիվանդանոցի փոխտնօրեն Հերման Բալիյանի թեկնածությունը։
Հիշեցնենք, որ Թուրքիայի Ազգային մեծ ժողովի ընտրությունները նախանշված են հունիսի 7-ին:

Աղբյուր` Թուրքագիտական պորտալ
AllTurkey.am