Իտալիայում բեմադրվել է Ցեղասպանության թեման շոշափող Էլիֆ Շաֆաքի «Ստամբուլի բիճը» ստեղծագործությունը

Էլիֆ Շաֆաքի «Ստամբուլի բիճը» վեպը, որում խոսվում է Հայոց ցեղասպանության մասին, և որը սկզբնական շրջանում արգելված էր Թուրքիայում, բեմադրվել է Իտալիայում, տեղեկացնում է Demokrat Haber-ը:
Արվեստի և պատմական կարևոր կենտրոններից մեկը համարվող Ֆլորենցիայի Ռիֆրեդի թատրոնում կայացել է պիեսի փակ պրեմիերան, և փակ ցուցադրությունները տեղի են ունենալու մինչև մարտի 15-ը:

Թուրք մուսուլման ընտանիքի և արմատներով Թուրքիայից ամերիկահայ Չաքմաքչյան ընտանիքի միջև Ստամբուլ-Սան Ֆրանցիսկո 90 տարի շարունակվող կապի մասին պատմող այս ստեղծագործությունը ներկայացնում է 1915-ի Հայոց ցեղասպանության վերաբերյալ երկու հանրությունների շփումը:
Թատրոնի ղեկավար Անգելո Սավելլին նշել է, որ գործը բեմադրելու համար Էլիֆ Շաֆաքից դժվարությամբ են թույլտվություն ստացել. գործընթացը տևել է երկու տարի:
Նա նշել է, որ «Ստամբուլի բիճը» վեպն իրեն շատ է հուզել:
«Օրհան Փամուքից հետո մեկ այլ համամարդկային գրող՝ Էլիֆ Շաֆաքին բացահայտեցի, և եթե անգամ նրան անձնապես չճանաչեմ, նրա բոլոր գրքերը կարդալուց հետո նրա երկրպագուն դարձա»,-ասել է նա՝ նշելով, որ Շաֆաքի «Ստամբուլի բիճն» Իտալիայում ամենաընթերցվող գրքերի թվում է:
Բեմադրության մեջ դերակատարություն ունի Սերրա Յըլմազը, որը նշել է, թե պիեսի՝ Հայոց ցեղասպանության 100-ամյակի տարում բեմադրվելը պարզապես համընկել է, սակայն ուրախ է, որ այդպես է ստացվել:
«Դա շատ խորհրդանշական եղավ, սակայն մենք դա միտումնավոր չենք կազմակերպել, բայց համընկնումը գեղեցիկ է»,-ասել է նա:
Էլիֆ Շաֆաքը դատապարտվել էր թուրքական Քրեական օրենսգրքի 301-րդ հոդվածով՝ այս ստեղծագործությամբ «թուրքերի ինքնությունը» վիրավորելու համար, սակայն ավելի ուշ արդարացվել էր:
Հիշեցնելով այդ մասին՝ Սերրա Յըլմազն ասում է. «Թուրքիայում ո՞ր գրողը դատական գործընթացով չի անցել: Անցյալին առերեսվելը շատ կարևոր է: Դա հանրային հոգեկան առողջության համար է կարևոր»:

http://www.tert.am/am/news/2015/03/06/shafak/1609725