Բոլորն էլ տականք են. Բահչելին վիրավորել է հայերին, Թուրքիայի իշխող կուսակցությանն ու PKK-ին

Թուրքիայի Ազգայնական շարժում կուսակցության առաջնորդ Դևլեթ Բահչելին վիրավորել է Արցախյան պատերազմում ադրբեջանցիների նկատմամբ փայլուն հաղթանակ տարած հայ զինվորներին, ինչպես նաև Թուրքիայի իշխող Արդարություն և զարգացում կուսակցությանն (ԱԶԿ) ու Քրդստանի աշխատավորական կուսակցությանը (PKK)։
«Կանանց բռնաբարող հայ զինյալի և ԱԶԿ-ի ու PKK-ի միջև որևէ տարբերություն չկա։ Նրանք բոլորն էլ տականքներ են»,- Բահչելիի խոսքերն է մեջբերում թուրքական «Հաբերլեր» կայքը։
Հիշեցնենք, որ Թուրքիայի վարչապետ Ահմեթ Դավութօղլուն խստորեն քննադատել է Ազգայնական շարժում կուսակցությանն ու, մասնավորապես, Բահչելիին, որը ավելի վաղ վիրավորել էր թուրքական իշխանություններին՝ Քրդստանի աշխատավորական կուսակցության (PKK) առաջնորդ Աբդուլլահ Օջալանի հետ համագործակցելու համար։
Նշենք, որ Բահչելին, «կանանց բռնաբարող հայ զինյալ» ասելով, ամենայն հավանականությամբ, նկատի է ունեցել Թուրքիայի և Ադրբեջանի կողմից հորինված «Խոջալուի ցեղասպանության» շրջանակներում առաջ քաշվող այն թեզը, ըստ որի՝ իբր հայ զինվորները 1992 թվականի փետրվարին Խոջալուում (Արցախի Իվանյան գյուղ) բռնաբարել են ադրբեջանցի կանանց և երեխաներին։
Աղբյուր` Թուրքագիտական պորտալ
AllTurkey.am