«Նռնաքարե վզնոցը». ռեժիսոր Սերժ Գաբյանի ֆիլմը` Հայոց ցեղասպանության մասին

Հինավուրց հայկական վզնոց, որը Հայոց ցեղասպանության տարիներին ձեռքից ձեռք է անցել և հասել մինչև մեր օրերը: Հիմա այն գտնվում է Նյու Յորքի մի մասնավոր պատկերասրահում և պատկանում է հայտնի թուրք ընտանիքի: Ինչպես տեղեկացնում է NEWS.am-ը, այս պատմությունն է 20-րդ դարասկզբի ողբերգական իրադարձությունների մասին ռեժիսոր Սերժ Գաբյանի՝ «Նռնաքարե վզնոցը» անվանումով լիամետրաժ գեղարվեստական ֆիլմի հիմքում:

Կայքի թղթակցի հետ զրույցում ռեժիսորը որոշ մանրամասներ է պատմել: Գլխավոր հերոսուհին՝ Նաիրին, հայուհի է, հագուստի մոդելավորող, որի նախնիներին էլ պատկանել է զարդը: Դրա նախշերն ու սիմվոլիկան ուղղակի կապ ունեն աղջկա ընտանիքի հետ: Հիմա Նաիրին իր ընտանիքի կանանցից սերնդեսերունդ իրեն հասած զարդանախշերն օգտագործելով՝ հագուստի հավաքածու է ստեղծում և հայտնվում Նյու Յորքում: Այստեղ էլ սկսվում է ժապավենի հիմնական պատմությունը:

Ռեժիսորի խոսքով, հանդիսատեսը ֆիլմում կտեսնի այս յուրօրինակ զարդի ամբողջ պատմությունը, որը սկսվել է 17-րդ դարից, անցել 20-րդ դարասկզբի ողբերգական իրադարձությունների միջով և հասել մինչև մեր օրերը:

Այժմ ռեժիսորն ու Ռուսաստանում գործող «Աշխարհի մարդիկ» հիմնադրամի նախագահ Ստեֆան Հեքիմյանը զբաղված են ֆիլմի ստեղծման պրոդյուսերական աշխատանքներով: Գաղափարը դուր է եկել Ֆրանսիայի, ԱՄՆ-ի և Ռուսաստանի հայկական մի շարք կազմակերպությունների ղեկավարներին, որոնք խոստացել են աջակցել ֆիլմի ստեղծմանն ու հնարավորինս արագ ներկայացնել այն հանդիսատեսի ուշադրությանը: Ծրագրվում է, որ «Նռնաքարե վզնոցը» մեծ էկրան կբարձրանա այս տարվա նոյեմբերին:

«Ֆիլմի հիմնական լեզուն անգլերենն է, քանի որ մեր գերխնդիրն է՝ մի ընտանիքի ու հայկական մի զարդի պատմությամբ համաշխարհային հանրության ուշադրությունը ևս մեկ անգամ սևեռել Հայոց ցեղասպանության խնդրի և դրա հետևանքների վրա»,- նշել է Սերժ Գաբյանը:

Նկարահանումներն անցկացվելու են Հայաստանում, Ղազախստանում, Լատվիայում և ԱՄՆ-ում: Գլխավոր պրոդյուսերները՝ Ստեֆան Հեքիմյանն ու նրա ամերիկացի գործընկերը, ինչպես նաև ժապավենի սցենարի հեղինակը՝ Հայաստանից Լիլիթ Մկրտչյանը, բանակցություններ են վարում հոլիվուդյան մի շարք հայտնի աստղերի գործակալների հետ: Գլխավոր հերոսուհու կերպարի համար նախատեսվում է հրավիրել Էմմա Ուոթսոնին կամ Էնն Հեթըուեյին, գլխավոր հերոսի կերպարի համար՝ Բրեդլի Կուպերին կամ Ջոշ Հարթնեթին: Երկրորդական դերերում էլ ժապավենի ստեղծագործական խումբը ցանկանում է տեսնել Փոլ Բեթանիին, Շայա Լյաբոֆին, Բենեդիկտ Քամբերբեթչին եւ Մոնիկա Բելուչիին: «Որոշ գործակալներ արդեն հավանություն են տվել սցենարին եւ նույնիսկ հիացմունք արտահայտել: Մոտ օրերս հարցն ավելի հստակ կդառնա»,- ասել է ռեժիսորը:
http://armeniangenocide100.org/armenian-genocide-film-expected-to-hit-big-screens-in-november/