Թուրքիան շարունակում է ջանքեր գործադրել Անին ՅՈւՆԵՍԿՕ-ի ցանկում ընդգրկելու ուղղությամբ

Թուրքիան շարունակում է ջանքեր գործադրել հայկական պատմական Անի քաղաքը, որը ներկայում գտնվում է հայ-թուրքական սահմանի մոտ` Թուրքիայի հատվածում, ՅՈւՆԵՍԿՕ-ի Համաշխարհային մշակութային ժառանգության ցանկում ընդգրկելու ուղղությամբ։

Թուրքական «Անադոլու» լրատվական գործակալության հետ զրույցում Կարսի մշակույթի ու զբոսաշրջության վարչության ղեկավար Հաքան Դողանայը նշել է, որ իրենք մտադիր են հասնել նրան, որպեսզի ցանկում ընդգրկվեն Անիի տարածքում գտնվող, պատմական արժեք ներկայացնող 21 հուշարձաններ ու հուշարձանախմբեր։ Նա ընդգծել է, որ դա կնպաստի զբոսաշրջության զարգացմանը, ինչն էլ, իր հերթին, մեծ եկամուտներ կապահովի։

Հարկ է նշել, որ հոդվածում որևէ կերպ չի հիշատակվում այն մասին, որ Անին հայկական քաղաք է։

Անին 2012 թվականից ներառված է ՅՈւՆԵՍԿՕ-ի համաշխարհային ժառանգության ժամանակավոր ցանկում, սակայն Թուրքիայում փորձում են այն ընդգրկել մշտական ցանկում, ինչի համար էլ աշխատանքներ են իրականացվում: Թուրքական կողմը փորձում է աշխատանքներն ավարտին հասցնել 2016 թվականին:

Ներկայում Անիում պեղումներ է իրականացնում Մերձավոր Արևելքի տեխնիկական համալսարանի գիտաշխատողներից ու միջազգային մասնագետներից կազմված խումբը: Սպասվում է, որ Սուրբ Փրկիչ եկեղեցու և Մրեն տաճարի վերականգնման աշխատանքներին կներգրավվեն նաև հայաստանցի մասնագետներ:

Աղբյուր` Թուրքագիտական պորտալ

AllTurkey.am

Լուսանկարը` Akunq.net-ի