Հ. Մ. Մ. «Նայիրի» միութեան նախաձեռնութեամբ՝ «Թուրքիայի կեցւածքը՝ Հայոց Ցեղասպանութեան 100-րդ տարելիցի նկատմամբ»

Հայոց Մեծ Եղեռնի 100-րդ տարելիցի միջոցառումների շարանում, փետրւարի 23-ի երեկոյեան Հ. Մ. Մ. «Նայիրի» միութեան Արւեստից բաժանմունքը նոյն միութեան «Սուքերեան» սրահում նախաձեռնել էր դասախօսական երեկոյ, թեման՝ «Թուրքիայի կեցւածքը՝ Հայոց Ցեղասպանութեան 100-րդ տարելիցի նկատմամբ»:
«ԱԼԻՔ», Կ. Դ. – Հայոց Մեծ Եղեռնի 100-րդ տարելիցի միջոցառումների շարանում, փետրւարի 23-ի երեկոյեան Հ. Մ. Մ. «Նայիրի» միութեան Արւեստից բաժանմունքը նոյն միութեան «Սուքերեան» սրահում նախաձեռնել էր դասախօսական երեկոյ, թեման՝ «Թուրքիայի կեցւածքը՝ Հայոց Ցեղասպանութեան 100-րդ տարելիցի նկատմամբ»:
Ծրագրի սկզբում միութեան վարչութեան նախագահ Ֆրէդ Աշուեանը նշեց, որ միութիւնը կեանքի է կոչել 100-րդ տարելիցի աշխատանքները նշող յանձնախումբ եւ կազմակերպւելիք ծրագրերի նպատակը ոչ միայն տեղեկութիւնների փոխանցումն է Ցեղասպանութեան մասին, այլ քաղաքական-հասարակական եւ իրաւաբանական դիտանկիւնից հարցերի քննարկումը: Ապա նա բեմ հրաւիրեց օրւայ երեք դասախօսներին՝ Հայ Դատի գրասենեակից Իսիկ Իւնանէսեանին, Թուրքիայի հարցերի վերլուծաբան Գրիգոր Ղազարեանին եւ Թ. Հ. Թ. Թեմական խորհրդի կողմից կեանքի կոչւած 100-ամեակի յանձնախմբի ատենապետ Արմենուշ Առաքելեանին:
Իսիկ Իւնանէսեանը իր ելոյթի ընթացքում հանգամանօրէն անդրադարձաւ Թուրքիայում իշխող պետական այրերի տեսակէտներին, մօտեցումներին եւ որդեգրած քաղաքականութեանը՝ Հայոց Ցեղասպանութեան վերաբերեալ ի մասնաւորի՝ 100-րդ տարելիցին: Նա կարեւորեց այն հանգամանքը, որը թէեւ նրանք վերջերս յաճախ են շրջանառում «ցաւում ենք» տերմինը Հայոց Ցեղասպանութեան նկատմամբ, սակայն այդ քայլի նպատակն է՝ շեղել միջազգային կարծիքը եւ իրականութեան մէջ շարունակւում է նրանց անփոփոխ ժխտողական քաղաքականութիւնը եւ ո՛չ Թուրքիայի նախագահը, ո՛չ վարչապետը, եւ ո՛չ էլ արտգործնախարարը՝ Էրդողանը, Դաւութօղլուն եւ Չաւուշօղլուն առիթը չեն փախցնում իրենց ժխտողական մօտեցումները դրսեւորելու համար:
Երկրորդ բանախօս Գրիգոր Ղազարեանը հանգամանօրէն անդրադարձաւ Հայոց Ցեղասպանութեան նկատմամբ Թուրքիայի հանրային կարծիքին, նրանց դասակարգելով երեք հատւածների. ա) անտարբեր եւ լուռ մնացողներ, բ) ժխտողներ, եւ գ) մտաւորականներ, որոնք վերջին տասնամեակին եւ ի մասնաւորի՝ Հրանտ Դինքի սպանութիւնից յետոյ՝ ոչ միայն արտայայտւում են Հայոց Ցեղասպանութեան մասին, այլեւ նոյնիսկ նախաձեռնութիւններով են հանդէս գալիս: Նա հանգամանօրէն անդրադարձաւ այն հանգամանքին, որ Թուրքիայում 90 տարի պետականօրէն ինչպիսի մօտեցում է դրսեւորւել Հայոց Ցեղասպանութիւնը խեղաթիւրելու հարցով: Նա վերջում աւելացրեց, որ Հայոց Ցեղասպանութիւնը Թուրքիայի մտաւոր խաւի մօտ այլեւս տաբու չէ:
Օրւայ երրորդ դասախօս Արմենուշ Առաքելեանը կարեւորութեամբ անդրադարձաւ Հայաստանում գումարւած Համահայկական խորհրդաժողովի Հռչակագրին, եւ այն բոլոր աշխատանքներին, որոնց հիմնական նպատակն է 100-ամեակը ճանաչումից դէպի հատուցում ուղղորդելը: Նա անդրադարձաւ յանձնախմբի կատարած եւ կատարելիք աշխատանքներին՝ աւելացնելով, որ հիմնականում նպատակ կայ Հայոց Ցեղասպանութեան իրողութիւնը փոխանցել մեր պարսիկ եւ այլ իրանցի հայրենակիցներին: Տկն. Առաքելեանը նշեց, որ ապրիլի 23-ի երեկոյեան Հայաստանի ժամով ժամը 19:15-ին, որը խորհրդանշում է 1915 թ. Ս. Էջմիածնում սկսւելու է Մեծ Եղեռնի նահատակների սրբադասման արարողութիւնը, որը ուղղակի հեռարձակւելու է Սփիւռքի տարբեր գաղթօջախներում եւ Ս. Սարգիս եկեղեցում եւս, որից յետոյ բոլոր եկեղեցիների զանգերը ղօղանջելու են 100 անգամ, ապա լինելու է ծաղիկների տեղադրում, համահաւաք եւ այլ միջոցառումներ: Նա աւելացրեց, որ պէտք է Ցեղասպանութիւնը բնութագրել որպէս յանցագործութիւն, քանզի յանցագործը պէտք է պատժւի եւ յանցագործը պարտաւոր է հատուցում տալ:
Վերջում հնչեցին հարցումներ՝ կապւած Թուրքիայի քաղաքականութեան, մտաւոր խաւի եւ հանրութեան մօտեցումների, ինչու չէ նաեւ համայնքային ծրագրերի մասին:
Alikonline.ir/hy