Թուրքական բնակավայրում մնացած 3 հայերից մեկը ցանկանում է պատգամավոր դառնալ

Թուրքիայի Մարդին նահանգի Դերիք շրջանում բնակվող 3 հայերից մեկը՝ 58-ամյա Զեքերիա Սաբունջին, հունիսի 7-ին կայանալիք խորհրդարանական ընտրություններում որպես պատգամավոր առաջադրվելու համար դիմել է քրդամետ Ազգերի ժողովրդավարություն կուսակցությանը:
Ինչպես տեղեկացնում է «Դողան» գործակալությունը, տարածաշրջանում բնակվող աշիրեթների միջև ահաբեկչական գործողությունների ու բռնության դեպքերի պատճառով 38 տարի առաջ Դերիքը լքած Սաբունջին այժմ առանց ընտանիքի վերադարձել է հայրենի բնակավայր և ցանկանում է պատգամավոր դառնալ:
Երեք երեխաների հայր Սաբունջին նշել է, որ Ստամբուլից վերադարձել է՝ հայրենիքին ծառայելու համար:
«Ազգերի ժողովրդավարություն կուսակցությունը շրջանում խաղաղության հաստատման համար մեծ դերակատարություն է ունեցել: Դա ինձ ուրախացնում է: Այդ պատճառով էլ ես ցանկացել եմ անդամակցել կուսակցությանը, և երջանիկ կլինեմ, եթե ներկայացված լինեմ խորհրդարանում»,-ասել է նա:
Դերիքում այժմ ընդամենը երեք հայ է ապրում՝ Զեքերիա Սաբունջին և ամուսնական մի զույգ:
http://www.tert.am/am/news/2015/02/26/sabunci/1601922