Մենք մաքրամաքուր ազգ ենք և ամոթալի պատմություն չունենք. Թուրքիայի խորհրդարանի խոսնակ

Թուրքիայի խորհրդարանի խոսնակ Ջեմիլ Չիչեքը Կանադայում հանդիպել է թուրքական համայնքի ներկայացուցիչների հետ և Հայոց ցեղասպանության վերաբերյալ հայտարարություններ արել, տեղեկացնում է թուրքական Haber7 կայքը:
«Մեր պատմության մեջ սև բծեր չկան: Ով ինչ ուզում է՝ թող անի»,- ասել է Չիչեքը:
Նա նաև քննադատել է արտերկրում բնակվող թուրքական համայնքներին ու մեղադրել կազմակերպված չլինելու համար:
«Մի երկրում հայերին կարող ես մատներիդ վրա հաշվել, բայց մարդիկ դիմում են խորհրդարանին ու ասում, որ թուրքերն իրենց կոտորել են ու բանաձև պահանջում: Բայց մենք այնտեղ 50 հազար թուրք ունենք, չենք կարողանում 500 հոգով մի դիմում ստորագրել: Քանի որ այս միությունը մասնատված է, մյուս միությունը մասնատված է… Արդյունքում որոշումն ընդունվում է, ու դրանից հետո մենք աղաչում ենք, որ չանեն, ասում ենք, որ դա ճիշտ չէ»,-ասել է Չիչեքը:
Նա պնդել է, թե հայկական սփյուռքը ողջ աշխարհում Թուրքիային սևացնելու արշավ է իրականացնում և դարձյալ խոսել է թուրքական բաց արխիվների մասին:
«Մեր պատմության մեջ ամոթալի ոչինչ չկա, մենք պարզ ճակատով ենք: Փա՛ռք Աստծո, հանցանք չունենք: Ով ինչ կուզի, թող ասի՝ մենք մաքրամաքուր ազգ ենք»,- ասել է Չիչեքը:
http://www.tert.am/am/news/2015/02/25/cicek-genocide/1600776