Ստամբուլում բախում է տեղի ունեցել թուրք ազգայնամոլների և հակաֆաշիստական նախաձեռնության անդամների միջև

Փետրվարի 22-ին Ստամբուլի Քադըքյոյ թաղամասում թուրք ազգայնականները հարձակվել են «Քադըքյոյում ռասիզմի համար տեղ չկա» նախաձեռնության անդամների վրա։ Այս մասին գրում է թուրքական «Էթքին» լրատվական գործակալությունը։
«Քադըքյոյում ռասիզմի համար տեղ չկա» նախաձեռնության անդամները երկար ժամանակ նախապատրաստվում էին փետրվարի 22-ին նախատեսված հակահայ ցույցի դեմ ակցիային։ Ակցիան թեև առայժմ չի կայացել, թաղամասում, այնուամենայնիվ, որոշ բախումներ են եղել հակաքրդական տրամադրություններով ազգայնականների և հակաֆաշիստական խմբի անդամների միջև։ Բարեբախտաբար, ոստիկաններին հաջողվել է հանդարտեցնել կրքերը։
Դրանից մեկ օր առաջ՝ Մայրենի լեզվի միջազգային օրը, նախաձեռնության անդամները մամուլի հաղորդագրություն են տարածել՝ կոչ անելով հարգել Թուրքիայում մայրենի լեզուներով խոսելը։
«Թող կորչի ռասիզմը, ապրեն մայրենի լեզուները» պաստառներով երթ է կազմակերպվել դեպի Սուրբ Թագավոր հայկական եկեղեցի, որտեղ ֆաշիստական խմբավորումները նախատեսել էին Խոջալուի դեպքերի տարելիցի կապակցությամբ «հայկական ահաբեկչության դեմ» խորագրով ակցիա անցկացնել։
Նշենք, որ Թուրքիան ակտիվորեն օգտագործում է «Խոջալուի դեպքերը» իր հակահայ քարոզչության համար: Պաշտոնական Անկարան Խոջալուի դեպքերի համար հայերին մեղադրում է «ադրբեջանցիների կոտորածի ու ցեղասպանության» համար և իր պնդումներն ակտիվորեն թմբկահարում միջազգային հարթակում:
Յուրաքանչյուր տարվա փետրվար ամսին թուրքական իշխանությունները երկրի ամբողջ տարածքում ակտիվացնում են Խոջալուի դեպքերի հետ կապված գործունեությունը, ինչն ուղեկցվում է խիստ հայատյաց տրամադրություններով: Միևնույն ժամանակ, թուրքական պետության հետ մեկտեղ՝ ադրբեջանական լոբբին ևս ակտիվորեն կազմակերպում է տարատեսակ միջոցառումներ, քարոզչական արշավներ՝ Թուրքիայում հակահայ կրքեր բորբոքելու համար:
Աղբյուր` Թուրքագիտական պորտալ
AllTurkey.am