Փերինչեքին դատել էին ոչ թե Ցեղասպանությունը ժխտելու, այլ հայերի հանդեպ ատելություն սերմանելու համար. Թաներ Աքչամ

Թուրքիայում Դողու Փերինչեքի գործով դատավարության մասին սխալ պատկերացում են կազմել: Համաձայն այդ պատկերացումների՝ Շվեյցարիայում ցեղասպանությունը ժխտելը հանցանք է: Եվ եթե մեկն ասի՝ «Ես այս կամ այն իրադարձությունը Ցեղասպանություն չեմ համարում», կպատժվի: Թուրք պատմաբան Թաներ Աքչամի՝ Taraf պարբերականում տպագրված հերթական հոդվածը Մարդու Իրավունքների եվրոպական դատարանում Փերինչեքի դատավարությանն ու Թուրքիայում ձևավորված կարծրատիպերի մասին է: Հոդվածը ներկայացնում ենք մասնակի կրճատումներով:
«ՄԻԵԴ-ի դատավարությանն ու Փերինչեքի պաշտպանության ռազմավարության միջև մեծ անդունդ կա: Դա ես որպես կոմեդիա էի բնորոշել: Սակայն նույն դատավարությունը ինձ նման` Հրանտի սպանությունից ցնցվածների համար որպես ողբերգություն պետք է գրվի:
Փերինչեքը հայերի հանդեպ ատելություն ու ոխ սերմանելու նպատակով ստեղծված «Թալեաթ փաշա» կոմիտեի հիմնադիրն է: Այդ կոմիտեն միայն ատելություն տարածելով չսահմանափակվեց, այլ Հրանտ Դինքի սպանության պատճառ դարձած քաղաքական արշավ իրականացրեց:
Փերինչեքի՝ ՄԻԵԴ-ում դատապարտվելու պատճառը հենց «Թալեաթ փաշա» կոմիտեն է, որն ատելությունն ու ոխը Թուրքիայի սահմաններում տարածելով չբավարարվելով՝ այն Եվրոպա է տեղափոխել:
Այժմ նա կանգնել է ՄԻԵԴ-ի առաջ և կարծես Ցյուրիխում կոնֆերանսի մասնակցող պրոֆեսորի նման ասում է. «1915-ին սպանություններ են տեղի ունեցել, սակայն ես դա իրավաբանորեն ցեղասպանություն չեմ համարում». նման կերպ պաշտպանություն իրականացնելը երկերեսանիություն է:

Դատավարությունը «1915-ին ցեղասպանություն եղե՞լ է, թե՞ ոչ» կոչելը, մարդկությանը խաբելուն ուղղված վատ դեմագոգիա է:
http://www.tert.am/am/news/2015/02/17/taner-akcam/1592471