Սխալ քայլ. Թուրքիայի ԱԳՆ-ի առաջին արձագանքը հայ-թուրքական արձանագրությունների հետկանչին

Հայաստանը Թուրքիայի հետ դիվանագիտական հարաբերությունները կարգավորելուն ուղղված 2009 թվականի հոկտեմբերի 10-ին ստորագրված Արձանագրությունները հետ է կանչել Ազգային ժողովի օրակարգից:
Թուրքական «Հուրրիյեթ» թերթին տված հարցազրույցում Թուրքիայի արտգործնախարարության դիվանագիտական աղբյուրը մեկնաբանել է Հայաստանի Հանրապետության նախագահ Սերժ Սարգսյանի այդ քայլը:
«Սխալ և անհաջող քայլ է: Դրանք անկեղծությունից զուրկ մոտեցումներ են»,-ասել է աղբյուրը:
Պարբերականը հիշեցրել է, որ ՀՀ ԱԺ նախագահ Գալուստ Սահակյանին ուղարկած նամակում Սերժ Սարգսյանը մեղադրել է Թուրքիային` ասելով. «Արձանագրությունների ստորագրումից 6 տարի է անցել: Այդ ժամանակահատվածում Հայաստանն Արձանագրությունները կյանքի կոչելու համար իր դիրքորոշումը չի փոխել: Սակայն Թուրքիայի կառավարությունը շարունակում է Արձանագրությունների ոգուն հակասող նախապայմաններ առաջ քաշել»:
Թուրքիայի ԱԳՆ-ից ստացված առաջին արձագանքը հետևյալն է. «Արձանագրությունները Հայաստանի խորհրդարանի օրակարգում էին, սակայն որևէ քայլ չէր արվում: Այդ որոշումը հայաստանյան կառույցների ներքին մեկնաբանությունն է: Սակայն դա ճիշտ չենք գտնում: Սխալ և անհաջող քայլ է: Դրանք անկեղծությունից զուրկ մոտեցումներ են»:
http://www.tert.am/am/news/2015/02/17/turkey-mfa/1592308