Ստորագրահավաք՝ Ստամբուլի պողոտաներից մեկը Պալյանների անունով կոչելու համար

Թուրքիայում էլեկտրոնային ստորագրահավաք է սկսվել, որի նպատակն է Ստամբուլի պողոտաներից մեկը կոչել Պալյան արքունի ճարտարապետների ընտանիքի անունով։ Այս մասին հաղորդում է թուրքական «Հաբեր 10» կայքը։
Պալյանների գերդաստանը Ստամբուլի ամենանշանավոր ճարտարապետական ընտանիքն է: Պալյանները կառուցել են մեծ թվով պալատներ, եկեղեցիներ, մզկիթներ, այլ շինություններ, որոնք ձևավորում են այսօրվա Ստամբուլի պատմական դիմագիծը:
Այս կապակցությամբ ակցիայի մասնակիցները Ստամբուլի քաղաքապետարանին, Բեշիքթաշի թաղապետարանին, Թուրքիայի ներքին գործերի նախարարությանը և մի քանի այլ պետական մարմինների կոչ են անում Ստամբուլին, Թուրքիային և, առհասարակ, ողջ մարդկությանը թողած մշակութային մեծ ժառանգության համար արտահայտել Պալյաններին իրենց երախտիքը՝ այս ընտանիքի անունով պողոտա անվանակոչելով։
Ստորագրահավաքի մասնակիցները կոչ են անում Պալյանների անունով կոչել Դոլմաբահչեից Օրթաքյոյ ձգվող պողոտան կամ էլ Չըրաղան պողոտան։ Որպես երրորդ տարբերակ առաջարկվում է Բեշիքթաշից դեպի Մաչկա բարձրացող պողոտան։
Աղբյուր` Թուրքագիտական պորտալ
AllTurkey.am
Լուսանկարը` Akunq.net-ի