Հայկական հարցի վերաբերյալ Էրդողանի նոր ռազմավարությունը. գերմանական պարբերականի անդրադարձը

Թուրքիայի նախագահը երկրի պատմության ամենանուրբ հարցում հարձակման է անցել: Ռեջեփ Թայիփ Էրդողանն Օսմանյան կայսրության տարիներին տեղի ունեցած Հայոց ցեղասպանության 100-ամյակի տարելիցից կարճ ժամանակ առաջ փորձում է ցույց տալ, որ բաց է այդ թեմայի շուրջ խոսակցությունների համար, գրում է գերմանական Der Tagesspiegel պարբերականը:
Նպատակը Ցեղասպանության 100-ամյակին աշխարհի մակարդակով Ցեղասպանության ճանաչումը կանխելն է:
Էրդողանն ուզում է, որ 1915-ին կատարվածի վերաբերյալ գիտական ուսումնասիրություն կատարվի: Սակայն նրա բուն նպատակը Ցեղասպանության համաշխարհային ճանաչումը կանխելն է:
Կոլումբիա կատարած այցի ընթացքում նախագահ Էրդողանը հայտարարեց, թե մինչ այժմ միլիոնավոր փաստաթղթեր են ուսումնասիրվել, և այդ արխիվը բաց է: Նա կոչ արեց, որ Հայաստանն էլ բացի, երրորդ երկրներն էլ բացեն իրենց արխիվները:
Հայաստանի նախագահն Էրդողանի՝ մասնագիտական հանձնաժողով ստեղծելու առաջարկը մերժում է՝ նշելով, որ ցեղասպանության իրողությունը վիճարկելն այլևս քննարկման ենթակա չէ: Էրդողանը դրան պատասխանում է՝ նշելով, թե այդ քայլը ցույց է տալիս՝ «ով է պատրաստ խոսելուն և ով՝ ոչ», գրում է թերթը:
Անկարան հայերի տեղահանության մեկնարկի օր համարվող ապրիլի 24-ը շատ է կարևորում: Նախագահ Էրդողանն այդ օրը Թուրքիա է հրավիրել 100-ից ավելի ղեկավարների, այդ թվում՝ ՀՀ նախագահ Սերժ Սարգսյանին, սակայն պլանավորված հանդիպումը ոչ թե Հայոց ցեղասպանությունը հիշատակելու, այլ Առաջին համաշխարհային պատերազմի ժամանակ Գալիպոլիի ճակատամարտի հաղթանակը տոնելու համար է: Սարգսյանը, ինչպես և ակնկալվում էր, այդ հրավերը մերժել է:
Հարցի վերաբերյալ Թուրքիայի պաշտոնական տեսակետը հետևյալն է. հայերի տեղահանության ընթացքում շատ մարդիկ են զոհվել: Դրան ի պատասխան Հայաստանն ու միջազգային ուսումնասիրողները պնդում են, որ Ցեղասպանություն տեղի է ունեցել: Բազմաթիվ երկրներ ճանաչել են Ցեղասպանությունը, գրում է թերթը։
http://www.tert.am/am/news/2015/02/13/erdogan-germany/1589194