Կը վերանորոգուի Մալաթիոյ Ս. Երրորդութիւնը

Թուրքիոյ Հայոց պատրիարքական փոխանորդ Արամ արք. Աթէշեան 21 յունուարին, Իսթանպուլաբնակ մալաթիացիներու հայրենակցական միութեան Բ. ատենապետ Սարգիս Չիզմէճիի եւ անդամներէն Գէորգ Էօզգարակէօզի ու Սերտար Պոյաճըի ընկերակցութեամբ այցելած է Մալաթիա: Արամ սրբազան յատուկ այցելութիւն մըն ալ տուած է քաղաքի կուսակալ Սիւլէյման Քամչըի:
Ճարտարապետ Գէորգ Էօզգարակէօզ կը տեղեկացնէ, թէ յառաջիկայ յունիս ամսուան մէջ կը սկսի քաղաքի «Թաշխորան» անունով ծանօթ Սուրբ Երրորդութիւն եկեղեցւոյ վերաշինութիւնը: Պատուիրակութիւնը Մալաթիա կեցութեան շրջանին այցելած էր նաեւ քաղաքի «Վենք» (Վանք-Ակունքի խմբ.) կոչուած մատուռը, ուր արդէն կը շարունակուէին գրեթէ աւարտին հասած վերանորոգման աշխատանքները:
Սրբազանը եւ իր ընկերակիցները հոգեհանգիստի կարգ կատարեցին Մալաթիոյ հայոց գերեզմանատան նորակառոյց մատրան մէջ: Այս արարողութեան ներկայ գտնուեցաւ մալաթիացի սակաւաթիւ հայերու կողքին՝ Էլազըղէն (Խարբերդ-Ակունքի խմբ.) ժամանած հայերու 15 հոգինոց խումբ մը: Վերանորոգման ծախսերը պիտի ապահովուին Մալաթիոյ կուսակալութեան կողմէ: Վերաշինութեան նախագիծը պիտի պատրաստեն Գէորգ Էօզգարակէօզ եւ Կարպիս Էւեափան:

http://asbarez.com/arm/215045/