«Հրանտին սպանել է 1915-ի մտայնությունը». «Ակօսի» ներկայիս խմբագրապետ

Ստամբուլի Քադըքյոյ (Քաղկեդոն) շրջանում թուրքական «Ասա` վերջ ցեղապաշտությանը» (DurDe) կազմակերպության կողմից քննարկում է կազմակերպվել Հայոց ցեղասպանության 100-ամյա տարելիցի կապակցությամբ, որին մասնակցել է նաև Կ.Պոլսում հրատարակվող «Ակօս» հայկական շաբաթաթերթի ներկայիս գլխավոր խմբագիր Էդվարդ Տանձիկյանը: Այդ մասին, ըստ Akunq.net-ի, հաղորդում է թուրքական «Էթքին» լրատվական գործակալությունը:
Աղբյուրի փոխանցմամբ, «1915-2015 թթ. Հայոց ցեղասպանությունը. 100-ամյա առերեսում» թեմայով կազմակերպված քննարկմանը, «Ակօսի» խմբագրապետից բացի, մասնակցել են նաև 2011 թ. ապրիլի 24-ին թուրքական բանակում կասկածելի պայմաններում սպանված հայազգի զինվոր Սևակ Բալըքչըի ծնողները` Անի և Կարապետ Բալըքչըները:
Տանձիկյանն, իր ելույթում նշելով, թե Հայոց ցեղասպանությունը Միություն և առաջադիմություն կուսակցության կողմից նախապես կազմակերպված կոտորած էր, շեշտել է, որ այն շարունակվել է նաև քեմալական` Ժողովրդահանրապետական կուսակցության կողմից:
«Ակօսի» խմբագրապետը հայտնել է, որ նույն գործընթացը, այլ չափանիշներով, շարունակվում է նաև Արդարություն և զարգացում կուսակցության իշխանության տարիներին: Նա մասնավորապես նշել է. «2014 թ. ապրիլի 23-ին վարչապետ Թայիփ Էրդողանը մի ցավակցական ուղերձ հրապարակեց: Ցավակցությունն անշուշտ միշտ էլ ընդունելի է, սակայն կառավարությունն այն ներկայացնում էր որպես «շնորհ»: Երբ ուշադրություն ենք դարձնում այդ ուղերձին, այնպիսի տպավորություն ենք ստանում, կարծես հայերն իրենք իրենց են սպանվել: Մենք այդ խնդրի վերաբերյալ խոսեցինք վարչապետի հետ, բայց կառավարությունը հայտնեց, թե ուղերձը չի հասկացվել: Վարչապետարանի հետագա հայտարարություններն ունեին հետևյալ բովանդակությունը` «Սփյուռքը փչացնում է գործը»: Դա, ըստ էության, արտացոլում է կառավարության նորօրյա պրոֆիլը: Այսինքն, դա արվում է հայկական համայնքին նեղելու համար»:
Տանձիկյանը նաև ուշադրություն է հրավիրել այն փաստի վրա, որ թուրքական կառավարությունը որոշել է այս տարվա ապրիլի 24-ին կազմակերպել Չանաքքալեի ճակատամարտի հաղթանակը նշելու արարողությունը:
«Ակօսի» ներկայիս խմբագրապետն իր խոսքւմ նաև ընդգծել է. «Հրանտին սպանել է 1915-ի մտայնությունը: Նույնիսկ ներկա պահին Թուրքիայի հայերը հարկադրված են Հայոց ցեղասպանության 100-ամյա տարելիցի կապակցությամբ որևէ բան ասելուց առաջ 40 անգամ մտածել»:
Akunq.net