Մոսկվայում տեղի է ունեցել Ռայմոն Կևորկյանի «Հայոց ցեղասպանություն. Ամբողջական պատմություն» գրքի շնորհանդեսը

Մոսկվայում Լրագրողների կենտրոնական տանը փետրվարի 10-ին տեղի է ունեցել ֆրանսահայ պատմաբան Ռայմոն Կևորկյանի «Հայոց ցեղասպանություն. Ամբողջական պատմություն» գրքի շնորհանդեսը:

Սորբոնի փիլիսոփայական գիտությունների թեկնածու, Աշխարհաքաղաքականության ֆրանսիական ինստիտուտի վաստակավոր տնօրեն Ռայմոն Կևորկյանի նախնիները Արևմտյան Հայաստանից էին՝ Խարբերդ քաղաքից: Նրա գիրքը լույս է տեսել ֆրանսերեն 2006 թ-ին, իսկ ռուսերեն՝ 2014-ին: Այս տարի այն կթարգմանվի նաև թուրքերեն:

Ինչպես հաղորդում է Mediamax-ը, Ռայմոն Կևորկյանը ուսումնասիրում է խնդիրը ակադեմիական գիտության շրջանակներում: Նրա մոտեցումը միկրոպատմաբանական է. նա կազմում է սպանվածների ցուցակները, զանգվածային սպանությունների և կոտորածների գրաֆիկները: Իր մարդկային ու մասնագիտական լավատեսության մեջ Ռայմոն Կևորկյանը հենվում է վիճակագրության վրա. 14-40 տարեկան թուրքերի 33%-ը ծանոթ է Հայկական հարցի վերաբերյալ թուրքական կեղծարարություններին:

«Հայերը աշխարհում միակ ազգն են, որ չեն կարողանում համակերպվել ահռելի մարդկային զոհերի հետ: Դա մեր մարդասիրական առաքելությունն է», – կարծում է Ռայմոն Կևորկյանը:

«Լրագրողների համագործակցություն» մեդիակոնգրեսի նախագահ Աշոտ Ջազոյանը իր հերթին նշել է, որ գրքի ռուսալեզու տարբերակի հրատարակման մեջ մեծ ներդրում են ունեցել ՌԴ վաստակավոր շինարար Վարդգես Արծրունին և «Անիվ» հայագիտական ուսումնասիրությունների կենտրոնը:

«Անկախ»-ի հաղորդմամբ, «Հայոց ցեղասպանության» ռուսերեն տարբերակով գրքի հրապարակումը համընկել է Առաջին համաշխարհային պատերազմի 100-րդ տարելիցի, ինչպես նաև Օսմանյան կայսրությունում իրականացված Հայոց ցեղասպանության 100-րդ տարելիցին նվիրված միջոցառումների հետ:
Պատմաբան Ռայմոն Գևորգյանը զգալի ներդրում է կատարել 1915-1916թթ. Հայոց ցեղասպանության պատմագրության մեջ: Օգտագործելով նախկինում սակավ ուսումնասիրված փաստաթղթեր, որոնք նա գտել է տարբեր երկրների արխիվներում` հասարակության ուշադրությանն է ներկայացնում արդիականացման և պետականացման ժամանակաշրջան ապրող պետության կողմից հայերի զանգվածային կոտորածների գաղափարական նախապայմանների, պլանավորման և իրականացման վերաբերյալ մանրամասն և համոզիչ զեկույց:
Վերջին երկու տասնամյակների ընթացքում Հայոց ցեղասպանությանը բազմաթիվ պատմական աշխատություններ են նվիրվել, որոնք այդ թեմայի ուսումնասիրության գործում առաջընթաց են ապահովում:

Սակայն անհրաժեշտ է նշել, որ ռուսական ռազմական և դիվանագիտական արխիվները նոր են միայն սկսվել կիրառվել այդ հարցի ուսումնասիրության գործընթացում և դեռևս համակարգային ուսումնասիրության առարկա չեն դարձել:

Հեղինակը հույս ունի, որ գրքի հրապարակումը կնապաստի նաև հենց Ռուսաստանում նոր ուսումնասիրությունների իրականացմանը:

Պատմության ուսումնասիրությունը յուրաքանչյուր անձի համար խիստ անհրաժեշտություն է, գործընթաց, որը նպաստում է անհատականության ձևավորմանը և հատկապես երիտասարդ սերնդի համար, իսկ առավել խոր իմաստով` ընդհանուր մարդկության կոլեկտիվ հիշողության ձևավորմանը: Զանգվածային բռնությունների ուսումնասիրությունն առանձնահատուկ կարևորություն ունի, քանի որ օգնում է այն վերապրածներին և նրանց ժառանգներին ընկալել փաստերը և հենց դրանով որոշակիորեն բուժիչ ներգործություն է ունենում:
http://armeniangenocide100.org/raymond-kevorkian-armenian-genocide-russian/