Թուրքիայի վարչապետն ընդունելու է հայ համայնքի ներկայացուցիչներին

Թուրքիայի վարչապետ Ահմեդ Դավութօղլուն փետրվարի 11-ի երեկոյան հանդիպելու է երկրի ազգային փոքրամասնությունների հասարակական, մշակութային գործիչների, հասարակական կազմակերպությունների անդամների և գիտնականների հետ:
Թուրքական «Հաբերլեր» լրատվակայքի փոխանցմամբ՝ հանդիպում-ճաշկերույթն անցկացվելու է Անկարայի Պալաս պատմական շենքում, որտեղ թուրք բարձրաստիճան պաշտոնյաներն ընդունում են հյուրերին:
Սպասվում է, որ հանդիպմանը կմասնակցի 50-ից ավելի մարդ: Հրավիրվածների թվում են նաև հայ համայնքի ներկայացուցիչներ, այդ թվում՝ «Ակօս» շաբաթաթերթի գլխավոր խմբագիր Էդվարդ Տանձիկյանը, երաժիշտ Կարո Մաֆյանը, գիտնական Հակոբ Կոտոգյանը, «Ենի Շաֆաք» թերթի հոդվածագիր Մարգար Եսայանը և այլք: Հրավիրվածների թվում են նաև տարբեր հայկական հիմնադրամների ղեկավարներ, ինչպես նաև տարբեր գիտական, հասարակական, մշակութային գործիչներ՝ հույն, հրեա, ասորի համայնքներից:
Հիշեցնենք, որ դեկտեմբերի 29-ին Ստամբուլի Դոլմաբահչե պալատի աշխատանքային գրասենյակում Դավութօղլուի նախաձեռնությամբ ազգային ու կրոնական փոքրամասնությունների համար տարեվերջյան ճաշկերույթ էր կազմակերպվել, ինչը առաջին նման դեպքն էր։
Թեև Արդարություն և զարգացում կուսակցության կառավարման տարիներին Թուրքիայի ազգային փոքրամասնությունների կյանքում որոշակի դրական տեղաշարժ կա, սակայն քիչ չեն նաև առկա խնդիրները: Օրինակ՝ Անկարան ինչպես հայկական, այնպես էլ հունական ու ասորական մի շարք կրոնական կառույցներ և այլ անշարժ գույք չի շտապում վերադարձնել իրական տերերին։
Թուրքիայի հայ համայնքին մինչ օրս հնարավորություն չի տրվում Աղթամար կղզու Սուրբ Խաչ եկեղեցին որպես եկեղեցի օգտագործել. այժմ այն ունի թանգարանի կարգավիճակ, իսկ ծիսական արարողություններ թույլատրվում է տարվա մեջ միայն մեկ անգամ: Նույն կերպ հույն համայնքը չի կարողանում վերաբացել Հելբելի կղզու հոգևոր դպրոցը, որը երկար տարիներ չի գործում: Ստամբուլի փոքրաթիվ հույն համայնքն ու հույն պատրիարքարանը փորձեր են ձեռնարկում` վերագործարկելու Անկարայի որոշմամբ փակված կրոնական կրթարանը, սակայն թուրքական կողմը չի շտապում հետքայլ կատարել:
Թուրքիան, որոշ հարցերում ընդառաջ գնալով ազգային և կրոնական փոքրամասնություններին, փորձում է ոչ միայն ապահովել իր համար դրական միջազգային իմիջ, այլ նաև այդ կերպ կատարում է միջազգային պարտավորությունները:
Աղբյուր` Թուրքագիտական պորտալ
AllTurkey.am