«Արքունի ծաղրածու». Թաներ Աքչամը՝ Դողու Փերինչեքին

Հայտնի թուրք պատմաբան Թաներ Աքչամը թուրքական «Թարաֆ» թերթի համար պատրաստած «Արքունի ծաղրածուն» հոդվածում անդրադարձել է Մարդու իրավունքների եվրոպական դատարանում (ՄԻԵԴ) Դողու Փերինչեքի գործին՝ քննադատելով վերջինիս արած հայտարարությունները և հոդվածի վերնագիրը հասցեագրելով հայատյաց այդ գործչին: Աքչամը Փերինչեքի մի շարք հայտարարություններ համարել է «տգիտություն» ու «զազրախոսություն»:
Աքչամը հոդվածում քննադատում է Փերինչեքի՝ դատարանում ասված այն խոսքերը, թե «Թալեաթ փաշան երբևէ չի դատվել որևէ թուրքական դատարանի կողմից»: Աքչամը նշում է, որ Փերինչեքի ստահոդ խոսքերը ծիծաղ են առաջացնում, քանի որ Թալեաթ փաշան երիտթուրք այլ ղեկավարների հետ մեկտեղ 1919 թվականին Ստամբուլում ստեղծված ռազմական դատարանների կողմից դատապարտվել է մահապատժի՝ պատերազմի ժամանակ կատարած հանցանքների, այդ թվում՝ հայերի զանգվածային կոտորածների համար: Աքչամը նաև հավելում է, որ իրականում Փերինչեքի ասած այդ խոսքերը որևէ կապ չունեին ՄԻԵԴ-ում ընթացող դատական գործի բնույթի հետ:
Այնուհետ նա քննադատում է Փերինչեքին և նրա շրջապատին՝ մարդասպան Թալեաթի անունը կրող կազմակերպություն ստեղծելու համար (հակահայ ուղղվածության «Թալեաթ փաշա» կոմիտեն-խմբ.):
Հիշեցնենք, որ 2005 թվականին «Թալեաթ փաշա» կոմիտեի հիմնադիրներից մեկը, Թուրքիայի աշխատավորական կուսակցության նախագահ Դողու Փերինչեքը Շվեյցարիայում հայտարարել էր, որ Հայոց ցեղասպանությունը «իմպերիալիստական սուտ է»։ Այս խոսքերի համար շվեյցարական դատարանը նրան 90-օրյա ազատազրկման էր դատապարտել, և որպես այլընտրանք՝ Փերինչեքը պետք է վճարեր ցեղասպանությունները ժխտողների համար օրենքով սահմանված տուգանքը։
Սակայն 2013 թվականի դեկտեմբերի 17-ին Մարդու իրավունքների եվրոպական դատարանը բավարարել էր Փերինչեքի հայցն ընդդեմ Շվեյցարիայի՝ պատճառաբանելով, թե իբր Շվեյցարիան խախտել է Մարդու իրավունքների եվրոպական կոնվենցիայի 10-րդ հոդվածը, այսինքն՝ խոսքի ազատության իրավունքը:
Այս որոշումից հետո Շվեյցարիայի կառավարությունը դիմեց ՄԻԵԴ՝ բողոքարկելու Փերինչեքի գործով որոշումը։ Նախորդ տարվա հունիսին ՄԻԵԴ-ի հինգ դատավորներից բաղկացած կազմը կայացրեց գործի քննությունը դատարանի Մեծ պալատ ընդունելու մասին որոշում: Հունվարի 28-ին կայացավ Փերինչեքի գործի բողոքարկումը: Այս գործով վերջնական որոշումը հայտնի կդառնա մոտ 4-6 ամիս անց:
Թուրքիայի վճռաբեկ դատարանը ժամանակին Էրգենեքոնի գործով ցմահ ազատազրկման դատապարտված, սակայն 2014 թվականին դատարանի որոշմամբ երկիրը չլքելու պայմանով ազատ արձակված Փերինչեքի վրա դրված արգելքը հունվարի 28-ի դատական նիստից մի քանի օր առաջ չեղյալ էր հայտարարել։
http://www.1in.am/1544286.html