Չանաքքալեում ներկայացուցչականություն կապահովվի, բայց հիմնականում՝ դաշնակիցների ու աֆրիկյան երկրների հաշվին.թուրքագետ

102 պետության ղեկավարի ապրիլի 24-ին Գալիպոլիի ճակատամարտի հոբելյանական միջոցառմանը ներկա լինելու հրավեր ուղարկած թուրքական պետությանը գուցե հաջողվի Չանաքքալեում ներկայացուցչականություն ապահովել, բայց հիմնականում՝ իր դաշնակիցների ու աֆրիկյան երկրների հաշվին: Tert.am-ի հետ զրույցում նման տեսակետ հայտնեց թուրքագետ Լևոն Հովսեփյանը՝ անդրադառնալով այն հաղորդմանը, որ 38 երկիր արդեն իսկ ընդունել է հրավերը:
«Հրավերն ընդունել են այնպիսի երկրներ, որոնք Թուրքիայի սերտ դաշնակիցներն են, բացի Նոր Զելանդիայից և Ավտրալիայից, օրինակ՝ Ադրբեջան, Ալբանիա, աֆրիկյան երկրներ՝ Մալի, Սոմալի, և պատահական չէ, որ վերջին շրջանում Էրդողանի մակարդակով այցեր կազմակերպվեցին»,-ասաց նա:
Հիշեցնենք, որ Weekly շաբաթաթերթը, հղում կատարելով canakkaleninrehberi.com-ին, նշել է, որ 38 երկիր ընդունել է հրավերը, սակայն չեն նշել, թե ինչ մակարդակով կներկայանան միջոցառմանը, ինչպես նաև ՝ բոլոր երկրները:
Լևոն Հովսեփյանն այս համատեքստում նկատեց, որ փոխարենը Հայաստանում կլինեն Ֆրանսիան՝ ամենաբարձր մակարդակով, ենթադրում է, որ նաև՝ Հունաստանի, Կիպրոսի նախագահները:
«Կարևոր է, որ Հայաստանում է լինելու Եվոպայի առաջատար տերություններից մեկի՝ Ֆրանսիայի նախագահը: Կարևոր է նաև Հռոմի պապի այցը: Այսինքն՝ մեզ մոտ բավականին բարձր ներկայացուցչականություն կլինի, իսկ Թուրքիայում ՝ բազմազան ու խայտաբղետ ներկայացուցչականություն»,-ասաց թուրքագետը:
Այնուամենայնիվ, նա կարծում է, որ իրատեսական չէ սպասել, որ ապրիլի 24-ին ամեն ինչ պետք է անցկացվի համամարդկային արժեքներին համապատասխան, այսինքն, որ բարոյական ընտրության հարց է լինելու՝ Չանաքքալե՞, թե՞ Ծիծեռնակաբերդ:
«Որոշ երկրների կողմից հրավերները կընդունվեն, և այստեղ մենք գործ ունենք նրանց՝ Թուրքիայի հետ փոխհարաբերությունների հետ, որոշ երկրներ կգերադասեն չվնասել իրենց հարաբերությունները Թուրքիայի հետ, վեր կդասեն իրենց պետական շահը»,-ասաց թուրքագետը:
Մյուս կողմից՝ նա կարծում է, որ որոշ երկրներ էլ կընտրեն երկակի մոտեցման մոդելը: Այսինքն՝ ներկայացուցիչներ կուղարկեն թե՛ Ծիծեռնակաբերդ, թե՛ Չանաքքալե:
Նա կարծում է, որ այդ երկակի մոտեցում կիրառող երկրների թվում կլինեն նաև Եվրամիության որոշ առանցքային երկրներ, այդ թվում՝ Գերմանիան, չի բացառվում նաև՝ ԱՄՆ-ը, բայց այս մասին դատողություններ անելը թուրքագետը դեռևս վաղ է համարում:
http://www.tert.am/am/news/2015/02/06/hovsepyan2/1582186