ՄԻԵԴ-ի քննությունը. Ցեղասպանությունը ճանաչող թուրք փաստաբանի հոդվածը

Թուրքիայում գործող փաստաբան, բազմաթիվ գործերում հայերի իրավունքները պաշտպանած, Հայոց ցեղասպանությունը ճանաչող Էրեն Քեսքինը, ով վերջերս Թուրքիայում 10-ամսյա ազատազրկման է դատապարտվել տխրահռչակ 301-րդ հոդվածով, իր հոդվածում անդրադարձել է ազգայնական գործիչ Դողու Փերինչեքի դատավարությանն ու նշել, որ այն բարդ քննություն է լինելու Մարդու իրավունքների եվրոպական դատարանի համար (ՄԻԵԴ): Թուրքական «Օզգյուր Գյունդեմ» կայքում հրապարակված նրա հոդվածը ներկայացնում ենք մասնակի կրճատումներով.
«Անցյալ շաբաթ Մարդու իրավունքների եվրոպական դատարանում կարևոր գործ քննվեց: Հանրության շրջանում որպես «Դողու Փերինչեքի դատ» հայտնի դարձած այդ դատավարությանը Թուրքիայի մարդու իրավունքների միությունը, Արդարության, իրականության ու հիշողության կենտրոնն ու Տորոնտոյում գործող Ցեղասպանությունների ու մարդու իրավունքների ինստիտուտը մասնակցելու հայտ ներկայացրեց: Մեր պահանջն ընդունվեց ՄԻԵԴ-ի կողմից:
Այսինքն` մենք այս դատավարության ընթացքում Դողու Փերինչեքի հակառակ կողմում տեղ զբաղեցրինք:
Տարիներ շարունակ գաղափարների համար դատապարտված, բանտարկված Դողու Փերինչեքի խոսքերը ոչ թե խոսքի ազատության, այլ բացահայտորեն հանցագործության դրդել ենք գնահատում:
Ահա նման դրդումների հետևանքով են, որ սպանվեցին Հրանտ Դինքը, Թահիփ Սանթորոն, Սևակ Շահին Բալըքչըն…
Հիշենք, թե ինչպես էին իրենց պահում Դողու Փերինչեքն ու նրա նմանները Հրանտ Դինքի և Օրհան Փամուքի դատավարությունների ընթացքում:
Իրենք իրենց 1915-ի ցեղասպանության կազմակերպիչներից ու իրականացնողներից մեկի՝ Թալեաթի անունով առանց ամաչելու «Թալեաթ փաշա» կոմիտե են կոչում: Եվ այդ կոմիտեն դատարանի մոտ բռնության կոչեր էր հնչեցնում: Եվ նոր մահերի, նոր հանցագործությունների պատճառ դարձան:
Ժխտումը միայն պարզապես «ցեղասպանություն չի եղել» ասելով չէ:
Կարճ ասած՝ Ցեղասպանության ժխտումը Թուրքիայում հայերի՝ դեռ վտանգի տակ ապրել է նշանակում:
Ժխտումն ատելություն է ծնում, ատելությունը սպանում է:
Մենք` մարդու իրավունքների պաշտպաններս, սա էինք ասում, իսկ պետությունն ու կուսակցություններն իրենց ողջ ուժով Փերինչեքի կողքին էին տեղ զբաղեցրել:

Դողու Փերինչեքը, Ժողովրդահանրապետական, Արդարություն և զարգացում, Ազգայնական շարժում կուսակցությունների պատգամավորները լուսանկարներում կարծես ասում էին. «Մենք ենք իթթիհաթական ցեղասպանները»:
Այժմ ՄԻԵԴ-ը քննություն է հանձնում: Դրա վճիռը կամ ատելության համար ճանապարհ է բացելու, կամ էլ ատելությանն ասելու է՝ «կանգ առ»: Կարևոր քննություն է սա»:
http://www.tert.am/am/news/2015/02/05/eren-keskin/1580167