Թուրքերը պատրաստ են եկեղեցի կառուցել Ստամբուլի Մալթեփե շրջանում

Ստամբուլի Մալթեփեի ղեկավար Ալի Քըլըչն իրենց շրջանում եկեղեցի կառուցելու պատրաստակամություն է հայտնել։ Այս մասին գրում է թուրքական «Էվրենսել» պարբերականը։
Մալթեփեում եկեղեցի կառուցելու մտադրությունը Քըլըչը հիմնավորել է Թուրքիայի վարչապետ Ահմեդ Դավութօղլուի՝ հին եկեղեցիները վերանորոգելու և նորը կառուցելու վերաբերյալ հայտարարությամբ։
Մալթեփեի ղեկավարը, սակայն, չի նշել, թե որ կրոնական ուղղության եկեղեցի պետք է կառուցվի շրջանում։
Հիշեցնենք, որ նախորդ տարվա վերջին Թուրքիայի վարչապետ Ահմեթ Դավութօղլուն ազգային ու կրոնական փոքրամասնությունների հոգևոր առաջնորդների հետ հանդիպման ժամանակ հայտարարել էր, որ ասորական համայնքը Ստամբուլում եկեղեցի կառուցելու իրավունք է ստացել։ Եկեղեցու համար Թուրքիայի կառավարությունը համապատասխան հողատարածք է տրամադրել ասորիներին Եշիլքյոյ թաղամասում։ Նախատեսվում է, որ եկեղեցու կառուցումը կարժենա 1,5 մլն ամերիկյան դոլար: Գումարը տրամադրելու են Թուրքիայում գործող ասորական հիմնադրամները: 25 հազար հոգանոց ասորական համայնքի նոր եկեղեցին կրելու է Սուրբ Մարիամ անունը:
Թուրքական լրատվամիջոցներն արդեն մեկ ամիս է՝ թմբակահարում են, որ այս եկեղեցին կլինի առաջինը, որը Թուրքիայի Հանրապետության պատմության ընթացքում է կառուցվում: Ներկայում Թուրքիայի կրոնական փոքրամասնություններն օգտագործում են օսմանյան շրջանում կառուցված հոգևոր կառույցները: Միևնույն ժամանակ Անկարան ինչպես հայկական, այնպես էլ հունական ու ասորական մի շարք կրոնական կառույցներ, այլ անշարժ գույք չի շտապում վերադարձնել իրական տերերին:
Նշենք, որ ավելի վաղ` 2014 թվականին, ասորիները Թուրքիայում կրթարաններ հիմնելու իրավունք են ստացել: Ասորական դպրոցները փակվել էին 1928 թվականին, և դրանից հետո 86 տարի ասորիները դպրոցներ չեն ունեցել:
Աղբյուր` Թուրքագիտական պորտալ
AllTurkey.am