Դիարբեքիրի, Վանի, Կեսարիայի հայկական եկեղեցիներում հոգևորականներ չկան

Չնայած Դիարբեքիրում, Վանում և Կեսարիայում հայկական եկեղեցիների առկայությանը՝ Պոլսո հայոց պատրիարքարանի կողմից հոգևորականներ չեն ուղարկվում, և այդ եկեղեցիներից ոչ մեկում կանոնավոր պատարագ չի մատուցվում:
Ինչպես տեղեկացնում է «Ակօս» շաբաթաթերթի կայքը, Ստամբուլի եկեղեցիներից և Իսկենդերունի (Ալեքսանդրիայի) եկեղեցուց բացի՝ որևէ այլ եկեղեցում հոգևորական չկա:
Անատոլիայի (Արևմտյան Հայաստանի-Ակունքի խմբ.) իսլամացած հայերից շատերը թեև ստիպված են եղել ապրել իրենց նոր ինքնությամբ, սակայն արմատներին վերադառնալ և իրենց պապերի մշակույթն պահպանել են ցանկանում:
Նրանց հիմնական խոչընդոտը, սակայն, Անատոլիայում կանգուն մնացած եկեղեցիներում հոգևորականների բացակայությունն է:
Ստամբուլի եկեղեցիներից բացի` միակ եկեղեցին, որը շարունակում է գործել և հոգևորական ունի, Ալեքսանդրիայի Սուրբ Քառասուն մանկաց եկեղեցին է, որտեղի հոգևոր հայրն Ավետիս Թաբաշյանն է:
Եվս երկու հոգևորական շրջում է Անատոլիայի հայկական եկեղեցիներում և պատարագ մատուցում ժամանակ առ ժամանակ:
Պոլսո Հայոց պատրիարքի փոխանորդ Արամ արքեպիսկոպոս Աթեշյանն ի պատասխան այդ հարցի՝ «Ակօս»-ին ասել է. «Չենք կարող ասել, որ Անատոլիայում պատարագներ չեն լինում: Տեր Գրիգոր Դամաթյանն անցյալ շաբաթ Էլազիգում էր, իսկ այս շաբաթ՝ Սըվասում»:
Անատոլիայի հայերը, սակայն, կարծում են, որ այս եկեղեցիներում պետք է մշտապես հոգևորական լինի:
Անցյալ տարի հիմնադրված Տարոնի Մուշի հայերի միության ղեկավար Արմեն Գալուստյանը քննադատում է պատրիարքարանին:
«Դիարբեքիրը կարևոր կենտրոն է և Անատոլիայի շատ շրջաններից մեկ ժամվա հեռավորությամբ է գտնվում: Մարդիկ շաբաթվա վերջին հանգիստ կարող են հասնել Դիարբեքիր: Միայն այստեղ չէ, Վանում էլ պետք է հոգևորական լինի, եթե ոչ ամեն շաբաթ, ապա գոնե ամիսը երկու անգամ պատարագ պետք է մատուցվի: Բաթմանում, Մուշում, Կեսարիայում բնակվող շատ հայեր կան: Այդ մարդիկ իրենց ինքնությանն են վերադարձել, և, հետևաբար, ցանկանում են ապրեցնել իրենց ինքնությունը: Դրա համար եկեղեցիները շատ կարևոր են»,- ասել է նա:
http://www.tert.am/am/news/2015/01/26/churchs/1570226