Ձեր ժեստն իր ազդեցությունը կորցնում է՝ ժխտողականության պատճառով. Զորյան ինստիտուտի արձագանքը Դավութօղլուին

Զորյան ինստիտուտի նախագահ Գրեգ Սարգսյանն արձագանքել է Թուրքիայի վարչապետ Ահմեթ Դավութօղլուի վերջին կոչին, որը հնչեցվել էր պոլսահայ լրագրող Հրանտ Դինքի սպանության տարելիցին նվիրված ուղերձում: Հիշեցնենք՝ Դավութօղլուն հայերին կոչ էր արել ամեն ինչ սկսել սկզբից:
Գրեգ Սարգսյանի պատասխանը ներկայացնում ենք հատվածաբար.
«Հրանտի սպանության տարելիցը 1915թ. տեղի ունեցած դեպքերը սևացնելու նպատակով օգտագործելը ցնցող էր: Ձեր ասածներն այն մասին, որ «այդ դեպքերը պատերազմով թելադրված տեղահանության քաղաքականություն էին», չեն համապատասխանում իրականությանը, ընդհակառակը՝ հայերի գոյության հիշատակն անգամ ջնջելուն ուղղված նպատակ է։
Ես էլ Ձեզ պես ցանկանում եմ, որ երկու ազգերի միջև «բարեկամություն ու խաղաղություն» հաստատվի: Ամբողջ սրտով ցանկանում եմ բացել մեր «սրտի ու մտքի» դռները: Սակայն ինչպե՞ս կարող ենք դա անել: 8 տարի է անցել Հրանտի մահվանից, սակայն իրական մարդասպանները, կամ Օգյուն Սամասթի հետ թուրքական դրոշի ֆոնին նկարվելու համար հերթ կանգնողները դեռ չեն պատժվել: Մեզնից ինչպե՞ս եք համբերություն ակնկալում:
Ես հույս ունեմ, որ Թուրքիայի քաղաքացիական հասարակությունը ձեր կառավարությունից պատմական իրողություններին առերեսվելու պահանջ ներկայացնելու համար ավելի ազդեցիկ կգտնվի:
Հայկական մշակութային արժեքները, օսմանյան/թուրքական մշակույթին իրենց նպաստը բերած հայ անհատներին արժևորելը վստահության կառուցման ճանապարհին կարող էր ժեստ լինել, սակայն ձեր ժեստն իր ազդեցությունը կկորցնի, քանի դեռ Հայոց ցեղասպանությունը ժխտելու թուրքական կառավարության քաղաքականությունը շարունակվում է:
Իմ ցանկությունն է, որ Դուք, որպես ձեր երկրի վարչապետ, ձեր կառավարությանն ու երկիրը 1915թ. իրական պատմության կողմը բերեք: Միայն այդ դեպքում հնարավոր կլինի «վերքերն ամոքելն ու բարեկամություն հաստատելը»։
http://www.tert.am/am/news/2015/01/24/zoryan/1568987