Հայ-թուրքական հարաբերություններում կարևորում ենք մարդկային փոխհարաբերությունները. Թուրքիայի ԱԳՆ խոսնակ

Թուրքիայի արտաքին գործերի նախարարության խոսնակ Թանժու Բիլգիչը լրագրողների հետ հանդիպմանն անդրադարձել է նաև Հայաստանի հետ հարաբերությունների կարգավորման հարցին։ Այս մասին հաղորդում է թուրքական «Իհլաս» լրատվական գործակալությունը:
Պատասխանելով «Ակօս» շաբաթաթերթի խմբագրապետ, հասարակական գործիչ Հրանտ Դինքի մահվան 8-րդ տարելիցի վերաբերյալ հարցին՝ Բիլգիչը ասել է հետևյալը. «Հայ-թուրքական հարաբերություններում կարևորում ենք մարդկային փոխհարաբերությունները, ուստի դեմ ենք 1915 թվականի իրադարձությունները քաղաքականության հետ կապելու փորձերին։ Հավատում ենք, որ երկկողմ հարաբերություններին լուսավոր ապագա է սպասվում, որի համար կան անհրաժեշտ բոլոր նախադրյալները»։
Բիլգիչը նաև հայտարարել է, որ հունվարի 27-ին արտգործնախարար Մևլութ Չավուշօղլուն Թուրքիայի հրեական համայնքի ներկայացուցիչների հետ մեկնելու է Լեհաստան՝ մասնակցելու Օսվենցիմի համակենտրոնացման ճամբարի ազատագրման 70-ամյակի հանդիսավոր արարողությանը։
Այս կապակցությամբ լրագրողների հարցերին պատասխանելիս Բիլգիչը նշել է, որ տեղյակ չէ, թե այդ միջոցառմանը Հայաստանից ովքեր են մասնակցելու, ինչպես նաև հավելել, որ միջոցառման շրջանակներում հայկական կողմի հետ հանդիպում չի նախատեսվում։
Նշենք, որ նախօրեին Թուրքիայի վարչապետ Ահմեդ Դավութօղլուն Հրանտ Դինքի սպանության տարելիցի կապակցությամբ հայտարարություն էր տարածել, որում գովեստի խոսքեր էր ասել հայ լրագրողի հասցեին, ինչպես նաև անդրադարձել հայ-թուրքական հարաբերություններին՝ առաջ քաշելով թուրքական թեզերը:
Թեև Թուրքիայում հաճախ են խոսում Հայաստանի և Թուրքիայի միջև հարաբերությունների վերականգնման գործընթացի կարևորության և իրենց կողմից արվող քայլերի մասին, սակայն պատկերն իրականում այլ է: Թուրքիան շարունակում է նախապայմաններ առաջադրել հայ-թուրքական կարգավորման գործընթացում՝ առաջ քաշելով Արցախյան հիմնախնդրի լուծումը: Թուրքիան տարբեր քայլերով ցույց է տալիս, որ չի ցանկանում դիվանագիտական հարաբերություններ հաստատել Երևանի հետ և բացել Հայաստանի հետ փակ սահմանը:
Աղբյուր` Թուրքագիտական պորտալ
AllTurkey.am