Թուրքական ընդդիմադիր կուսակցությանը զայրացրել է կուսակիցների երթը՝ «Առերեսվե՛ք Ցեղասպանությանը» կարգախոսի ներքո

Թուրքիայի ընդդիմադիր Ժողովրդահանրապետական կուսակցության ներկայացուցիչներին զայրացրել է իրենց կուսակից պատգամավորների արարքը, որոնք մասնակցել են «Ակօս» թերթի խմբագրապետ Հրանտ Դինքին նվիրված միջոցառմանն ու քայլել են «Առերեսվե՛ք Հրանտի հետ, Ցեղասպանությանը» կարգախոսի ներքո:
«Այդընլըք» թերթի հետ զրույցում կուսակցության անդամ, նախկին պատգամավոր Շահին Մենգյուն նշել է, որ պատգամավորները կարող էին մասնակցել միջոցառմանը, սակայն նման պաստառի ներքո քայլելը սխալ է:
«Հրանտ Դինքի սպանությունն անընդունելի է, սակայն պնդումները, որ 1915թ. հայերի հանդեպ ցեղասպանություն է տեղի ունեցել, մեծ սխալ է: Սա վիրավորանք է՝ ուղղված մեր կուսակիցներին»,-ասել է նա:
Կուսակցական Քեման Անադոլը պնդել է, որ սա 2015թ-ի համար նախատեսված սցենարի առաջին տեսարանն էր: «Դինքին սպանողներից բացատրություն պահանջելն այլ բան է, անցյալին առերեսվելու կոչ անելը՝ այլ: Դինքին գործիք դարձնելով՝ անցյալին առերեսվելու կոչ անելը երկերեսանիություն է»,-ասել է նա:
Կուսակցությունից մեկ այլ նախկին պատգամավոր հիշեցրել է, որ իրենց կուսակցությունը տարիներ շարունակ դեմ է հանդես գալիս Ցեղասպանության «պնդումներին»: Նա Twitter-ի իր միկրոբլոգում անընդունելի է համարել որոշ կուսակցականների՝ այդ պաստառի ներքո քայլելը:
Դինքի հիշատակի միջոցառմանը Ժողովրդահանրապետական կուսակցությունից մասնակցել են Շաֆաք Փավեյը, Ումութ Օրանը, Սուլեյման Չելեբին, Քադիր Գյոքմենը, Հուսեյին Այգյունը:
http://www.tert.am/am/news/2015/01/22/chp/1566655