Ստամբուլի օդանավակայանը թռչող սարքի միջոցով նկարահանած հայ երիտասարդին ահաբեկիչ են համարում

Ստամբուլի Աթաթուրքի անվան օդանավակայանում ինքնաշեն թռչող սարքի միջոցով 12 րոպե տեսանկարահանում իրականացրած Ասպետ Մանուկյանը բացահայտել է օդանավակայանի խոցելի կողմերը, որտեղ օրական 1.300 ինքնաթիռ է վայրէջք ու թռիչք իրականացնում, տեղեկացնում է Milliyet թերթի կայքը:
YouTube-ում տեղադրված տեսանյութը խուճապ է առաջացրել ավիացիայի ոլորտում:
Ավիացիայով հետաքրքրվող Ասպետն Աթաթուրքի անվան օդանավակայանի տարածքում լուսանկարներն ու տեսանյութերն արել է հեռակառավարվող թռչող սարքի միջոցով:
Լուսանկարիչ Ասպետ Մանուկյանը, սակայն, տեսանյութի հրապարակումից հետո քննադատության է արժանացել: Քննադատների մեծ մասը պնդում է, որ անօրինական թռիչքներ իրականացրած Մանուկյանը վտանգել է այլ ինքնաթիռների թռիչքի անվտանգությունը:
Չնայած Ասպետ Մանուկյանն իր անփութության համար ներողություն է խնդրել, սակայն նրան արդեն մեղադրանք է ներկայացվել:
Շատերը պնդում են, որ նա ահաբեկիչ է և անդամակցում է որևէ ահաբեկչական խմբավորման:
Մանուկյանը, սակայն, հերքել է այդ տեղեկությունները՝ նշելով, որ չի մտածել, որ իր սարքի թռիչքով բազմաթիվ մարդկանց կյանքեր է վտանգում, և ասել է, որ իր պատրաստած սարքը խաղալիք է համարել:
http://www.tert.am/am/news/2015/01/21/airport/1566071