«The Independent». Հայկական Հոլոքոստը թաքցնելու Թուրքիայի ամոթալի փորձը

NEWS.am-ը զգալի կրճատումներով ներկայացնում է լրագրող Ռոբերթ Ֆիսկի հոդվածը, որը հրապարակվել է «The Independent» թերթում:
Երբ համաշխարհային առաջնորդները, այդ թվում արքայազն Չարլզը, Ավստրալիայի եւ Նոր Զելանդիայի վարչապետները, Թուրքիայի կառավարության հրավերով ապրիլին կհավաքվեն Գալիպոլիում՝ ի հիշատակ Առաջին համաշխարհային պատերազմի ժամանակ տեղի ունեցած ճակատամարտի, 1,5 մլն սպանված հայերի ուրվականները կուղեկցեն նրանց:
Դա դիվանագիտական հիմարության աննախադեպ գործողություն է: Թուրքիան նախատեսում է օգտագործել 1915 թվականին դաշնակիցների ներխուժման փորձի 100-ամյակը, որպեսզի խեղդի իր կողմից Օսմանյան կայսրությունում հայերի զանգվածային սպանությունների զոհերի հիշատակը: Այդ կոտորածները XX դարի առաջին կիսաարդյունաբերական Հոլոքոստն էին: Թուրքերն արդեն 102 երկրների հրավեր են ուղարկել Գալիպոլիի իրադարձություններին նվիրված արարողությանը մասնակցելու համար, որը տեղի կունենա ապրիլի 24-ին, նույն օրը, երբ Հայաստանն իր հարգանքի տուրքն է մատուցում Հայոց ցեղասպանության զոհերին:
Թուրքիայի նախագահ Ռեջեփ Թայիփ Էրդողանը, նախաձեռնություն դրսեւորելով, հրավիրել է նաեւ ՀՀ նախագահին` շատ լավ իմանալով, որ այն կմերժվի: Դրանից առաջ ինքն էր հրավեր ստացել ՀՀ նախագահ Սերժ Սարգսյանից` նույն օրը մասնակցել Հայոց ցեղասպանության զոհերի հիշատակի արարողությանը:
Սա պարզապես դիվանագիտական չարաճճիություն չէ: Թուրքերը շատ լավ հասկանում են, որ Գալիպոլիում դաշնակիցների մուտքը եղել է ապրիլի 25-ին, մեկ օր անց այն օրից, երբ հայերը հիշատակում են Հայոց ցեղասպանությունը, որը պատվիրվել ու իրականացվել է օսմանյան Թուրքիայի կառավարության կողմից:
Դեռեւս երկու տարի առաջ այն ժամանակվա Թուրքիայի նախագահ Աբդուլլահ Գյուլը Մեծ ճակատամարտի 98-ամյակը նշեց 2013-ի մարտի 18-ին, այն օրը, երբ սկսվեցին Բրիտանիայի օդուժի կողմից թերակղզու ռմբակոծումները Դարդանելի նեղուցում: Այն ժամանակ Թուրքիայում ոչ ոք չէր ենթադրում, որ Գալիպոլիի կամ Չանաքքալեի իրադարձությունները թուրքական ձեւով հիշատակելու են ապրիլի 24-ին:
Թուրքերն, իհարկե, վախենում են, որ 1915-ը կհիշվի որպես իրենց երկրի կողմից մարդկության դեմ ուղղված սարսափելի հանցագործության տարեթիվ, երբ տասնյակ հազարավոր տղամարդիկ սպանվեցին զենքով ու դանակներով, կանայք բռնաբարվեցին, իսկ հետո մահացան սովից իրենց երեխաների հետ միասին դեպի Միջագետք գաղթի ճանապարհին:
Այսօր պատմությունը այդ նույն սպանության դաշտերը ժառանգություն է տվել «ցեղասպան» բանակին՝ «Իսլամական պետությանը», որի գրոհայինները ավերել են հայկական եկեղեցին՝ կառուցված ի հիշատակ Հայոց ցեղասպանության զոհերի:
Հայերը ցեղասպանության զոհերի հիշատակի օր են ընտրել ապրիլի 24-ը, քանի որ այդ օրը թուրք ոստիկանները սկսեցին Ստամբուլում ձերբակալել հայ մտավորականներին, իրավաբաններին, բժիշկներին, ուսուցիչներին ու լրագրողներին:
Ինչպես Գերմանիայի ռեւիզիոնիստ պատմաբանները հերքում են հրեաների Հոլոքոստը, այնպես էլ Թուրքիան միշտ մերժել է իր վրա վերցնել Օսմանյան կայսրության կողմից կատարված մարդության դեմ ուղղված հանցագործության պատասխանատվությունը, որը տեղի է ունեցել 1914-18 թվականներին:
http://news.am/arm/news/248701.html