Թուրք եւ քուրդ լրագրողները Երեւանում մասնակցեցին Հրանտ Դինքի հիշատակի քայլերթին

«Ակօս» թերթի խմբագիր Հրանտ Դինքի մահվան 8-րդ տարելիցի կապակցությամբ հունվարի 19-ին մոտ երկու տասնյակ մարդիկ Ծիծեռնակաբերդ հուշահամալիրից լուռ քայլերթով գնացին Ազատության հրապարակ։
Նախաձեռնության հեղինակ, «Հրանտ Դինք» հիմնադրամի անդամ Սյուզան Մեյրեմ Ռոսիտայի խոսքով՝ այս ակցիայով իրենք նաեւ արդարության պահանջ են ներկայացնում Թուրքիայի կառավարությանը, իսկ քայլերթի երթուղին պատահական չէ ընտրված։
«Ցեղասպանության ճանչումը հավանաբար նաեւ մեկ այլ ճանապարհ է երկխոսություն սկսելու եւ համագործակցելու համար։ Ցեղասպանությունը հայերի եւ թուրքերի միջեւ հարաբերությունների ավարտն էր, իսկ ճանաչումը նոր համագործակցության սկիզբ կդնի։ Ահա թե ինչու որոշեցինք սկսել այստեղից եւ ուղեւորվել դեպի Ազատության հրապարակ, որը 1965թ. լռությունը խախտելու համար կարեւոր հարթակ դարձավ»,- NEWS.am-ի հետ զրույցում ասաց Սյուզան Մեյրեմ Ռոսիտան։
Նրա խոսքով՝ Հրանտ Դինքի սպանությունը առիթ դարձավ, որ Թուրքիայում ավելի շատ խոսեն Ցեղասպանության մասին։
«Հրանտ Դինքի սպանությունից հետո մարդիկ դուրս են գալիս փողոց եւ արդարություն են պահանջում ոչ միայն Հրանտի, այլեւ Եղեռնի զոհերի համար։ Նրա սպանությունից հետո շատ բան է փոխվել Թուրքիայում։ Ինձ համար հաճելի է գտնվել Երեւանում եւ «Ծիծեռնակաբերդի» հուշահամալիրից լուռ երթով քայլել դեպի Ազատության հրապարակ եւ մտորել Հրանտի մասին, թե որքան է նա փոխել մեզ եւ Թուրքիան։ Ինձ համար աղոթքի պես մի բան է Հրանտի հիշատակին նվիրված երթը»,- ասաց նա՝ ընդգծելով, որ Ցեղասպանությունը դեռեւս շարունակվում է Թուքիայում, քանի դեռ Հրանտ Դինքի նման խաղաղ քաղաքացիները սպանվում են հայ լինելու պատճառով։
Նշենք, որ քայլերթին մասնակցում էր մոտ 2 տասնյակ մարդ՝ այդ թվում, թուրք, քուրդ լրագրողներ եւ հասարակական գործիչներ:
http://news.am/arm/news/248549.html