Հայոց ցեղասպանությունը շարունակվում է հայկական եկեղեցիների դեմ. քրդական լրատվամիջոցի արձագանքը

Էրզրումի (Կարին-Ակունքի խմբ.) Ազիզիե շրջանում սկզբում որպես ախոռ օգտագործվող հայկական Սուրբ Մինաս եկեղեցին այժմ գանձ որոնողների ուշադրության կենտրոնում է հայտնվել և «մասնավոր սեփականություն» լինելու պատճառաբանությամբ անհրաժեշտ ուշադրության չի արժանանում, գրում է Dicle լրատվական գործակալությունը:
Հայկական տասնյակ եկեղեցիներ նույն ճակատագիրն են կիսում. ավերակների վերածված եկեղեցիների պատերին հայերի հանդեպ ատելության դրսևորումներ են հայտնվել:
««Յոթ հայ սպանողը դրախտ է ընկնում» պնդումն ու «հայ» և «հայի զավակ» բառերը դեռ որպես հայհոյանք են օգտագործվում Էրզրումում: 1915թ. Ցեղասպանությունից հետո մնացած հայկական ունեցվածքները՝ գործատեղիները, բաղնիքը, տներն ու եկեղեցիներն ավերվում են»,-գրում է լրատվամիջոցը:
Ճակատագրի քմահաճույքին հանձնված Սուրբ Մինաս եկեղեցին էլ ավերման եզրին է:
Եկեղեցու կառուցման ժամկետը հայտնի չէ, ենթադրաբար կառուցվել է 17-րդ դարում:
Եկեղեցին «հայտնաբերվել» էր 2012 թվականին քաղաքի վերակառուցման աշխատանքների ընթացքում, երբ դրա չորս կողմը մաքրվել էր: Պարզվել էր, որ տեղի բնակիչներն այն որպես ախոռ են օգտագործում:
Այժմ էլ լքված եկեղեցին գանձ որոնողների ուշադրության կենտրոնում է:
«Եկեղեցում կանգուն մնացած մաս չկա»,- ասում է քաղաքացի Դիյադդին Աքը:
Նա պատմում է, որ սա հայկական հին բնակավայր է եղել:
«Երբ հայերը ստիպված եղան լքել այս հողերը, այն սկսեցին ավերել: Նախկին դուռը փոխել են, հին՝ երկաթե դուռը տարել են ու փոխարենն ախոռի փայտե դուռ դրել: Բավական թալանվել է: Անգամ պատի նկարներն են տարել: Նախկինում այստեղ հոգևորականի տուն է եղել: Ամեն ինչ տարել են, միայն խաչ պատկերված քարերն են մնացել»,- պատմել է նա:
http://www.tert.am/am/news/2015/01/19/Dicle-churchs/1563579