Էրդողանն ապրիլի 24-ին ՀՀ նախագահին հրավիրում է Թուրքիա

«Milliyet» թերթի սյունակագիր Սերփիլ Չևիքջանի «Էրդողանի 2-րդ անակնկալը» վերտառությամբ հոդվածում տեղեկություն է հաղորդվում այն մասին, որ Թուրքիայի նախագահ Ռեջեփ Թայիփ Էրդողանը Դարդանելի ռազմական գործողությունների 100-ամյակի կապակցությամբ պետականորեն կազմակերպելիք միջոցառումներին, ի թիվս աշխարհի երկրների այլ նախագահների, նախատեսել է հրավիրել ՀՀ նախագահ Սերժ Սարգսյանին:
Նշվում է, որ Անկարան պատրաստվում է 2015-ի ապրիլի 23-24-ին հյուրընկալել 102 երկրների նախագահներին կամ վարչապետներին, որոնց ուղարկվել են մասնակցության հրավերներ:
Հոդվածի հեղինակը ուշագրավ է համարել այն հանգամանքը, որ մասնակցության հրավեր է ուղարկվել նաև ԱՄՆ նախագահ Բարաք Օբամային, ով ավանդաբար ամենամյա ապրիլքսանչորսյան ելույթներ է ունենում` ցավակցելու համայն հայությանը:
ՀՀ նախագահին ուղարկված հրավերի կապակցությամբ, ըստ Չևիքջանի, թուրքական կառավարության ներկայացուցիչը հետևյալ պարզաբանումն է տվել.
«Դարդանելում մարտնչած և նահատակված զինվորների շարքերում եղել են էթնիկական տարբեր ծագման բազմաթիվ երիտասարդներ: Նրանց մեջ եղել են նաև հայեր: Այլ կերպ ասած` միասին ենք պայքարել, դրա համար էլ Սարգսյանին էլ է հրավեր ուղարկվել»:
Ընդգծվում է, որ ամեն տարվա ապրիլի 24-ը հայ-թուրքական հարաբերությունների գերլարման շրջանն է: Ահա թե ինչու է Անկարայի համար կարևոր հրավերի համար տվյալ օրվա ընտրությունը:
«Եթե Օբաման և Սարգսյանն ընդունեն այդ հրավերը, ապա դա կլինի պատմության մեջ մեծ հետք թողնող անակնկալ»,- գրում է «Միլլիյեթ»-ը:
Թուրքական էլեկտրոնային լրատվամիջոցներում (արդեն ավելի քան 1 տասնյակ) լայնորեն տարածվում է «Միլլիյեթ»-ի հրապարակած վերոնշյալ տեղեկությունը: Թուրքական լրատվամիջոցները Էրդողանի այդ քայլը բնութագրում են իբրև պատմական նշանակության քայլ:
http://ermenihaber.am/?lang_id=2&news_=3&cur_news=2214