Թուրք հայտնի բանաստեղծն անդրադարձել է նաև Հայոց ցեղասպանության թեմային

Հայտնի թուրք գրող Նազըմ Հիքմեթն իր տարբեր ստեղծագործություններում անդրադարձ է կատարել նաև հայերի կոտորածների թեմային: Այս մասին իր էջերում գրում է Թուրքիայում գործող հայկական «Ակօս» շաբաթաթերթի թուրք հոդվածագիր Սերդար Քորուջուն:
Հիքմեթը թուրքական գրականության ամենաճանաչված դեմքերից է, ծնվել է 1902 թվականին Սալոնիկում, կյանքից հեռացել է 1963 թվականին Մոսկվայում: Հայտնի է եղել որպես կոմունիզմի կողմնակից, երկար տարիներ ապրել է Խորհրդային Միությունում, քաղաքական հալածանքների է ենթարկվել Թուրքիայի Հանրապետությունում:
«Ակօսը» նշում է, որ հայտնի գրողն իր բանաստեղծություններում անդրադարձել է ինչպես 1915 թվականին սկիզբ առած Հայոց ցեղասպանությանը, այնպես էլ ավելի վաղ իրականացված հայերի կոտորածներին:
«Իմ հայրենիքից մարդկային պատկերներ» գրքում Նազըմ Հիքմեթն անդրադարձ է կատարում նաև հայերի կոտորածներին: Իր ստեղծագործություններում նա գրել է նաև 1908 թ Ադանայի (Կիլիկիայի) հայերի կոտորածների մասին:
Հայկական թերթը նշում է, որ Նազըմ Հիքմեթի` Ցեղասպանության թեմայով հայտնի ստեղծագործություններից է 50-ականներին գրված «Բանտից դուրս գալուց հետո» բանաստեղծության` «Երեկոյան զբոսանք» բաժինը: Այստեղ ներկայացված է հայերի կոտորածների ժամանակ հորը կորցրած հայ աղջկա պատմությունը:
Նշենք, որ կոմունիստական գաղափարների կրող Հիքմեթն իր կենդանության օրոք հալածվել է թուրքական պետության կողմից, նրա աշխատանքները ենթարկվել են գրաքննության: Թուրքիայում նրա դեմ բազում դատական գործեր են բացվել, ազատազրկում է կրել, իսկ 1951 թվականին զրկվել է Թուրքիայի քաղաքացիությունից: Միայն 21-րդ դարում է նրան հետմահու վերադարձվել թուրքական քաղաքացիությունը:
Աղբյուր` Թուրքագիտական պորտալ
AllTurkey.am