Պոլսահայ ականավոր հասարակական գործիչ, լրագրող, «Ակօս» թերթի հիմնադիր-խմբագրապետ Հրանտ Դինքի սպանության գործով վերսկսված դատավարության ընթացքն ուղեկցվում է ցնցող զարգացումներով:
Նման բնորոշում է տվել թուրքական «Հըզլը հաբեր» լրատվակայքը: Աղբյուրի համաձայն` Տրապիզոնի ոստիկանության հետախուզության վարչության աշխատակից երկու ոստիկանի` Մուհիթթին Զենիթի և Օզքան Մումջուի նկատմամբ կալանքը որպես խափանման միջոց կիրառելու որոշում է ընդունվել:
Նշվում է, որ այդ անձինք 2014-ի դեկտմեբերի 26-ին ցուցմունքեր էին տվել հարցաքննության վարույթն իրականացնող դատախազ Գյոքալփ Քյոքչուին: Հարցաքննությանը հետևել էր ոստիկաններին կալանավորելու մասին դատախազի որոշումը, բայց դատարանը նրանց ազատ էր արձակել: Դատախազ Քյոքչուն Ստամբուլի N 6 քրեական դատարանում բողոքարկել էր ոստիկանների ազատ արձակման վճիռը: Արդյունքում որոշում է կայացվել կալանավորել կասկածյալի կարգավիճակում հայտնված ոստիկաններին:
Նրանք մեղադրվում են «պաշտոնի չարաշահման» և «հանցավոր անփութության հետևանքով սպանության պատճառ լինելու» մեջ: Հայտնի է դարձել, որ Դինքի սպանությունից առաջ նրանք հեռախոսազրույցներ են ունեցել, բայց այդ մասին ոչինչ չեն տեղեկացրել Ստամբուլի ոստիկանության հետախուզության վարչությանը:
Հիշեցնենք, որ Հրանտ Դինքը սպանվել է «Ակօս»-ի խմբագրատան դիմաց, 2007 թվականի հունվարի 19-ին: Սպանության անմիջական կատարող Օգյուն Սամասթը դատապարտվել է 25 տարվա ազատազրկման:
http://ermenihaber.am/?lang_id=2&news_=9&cur_news=540
Leave a Reply