Պատմական Հայաստանը 100 տարի անց. հրատարակվել է ուղեցույց՝ Արևմտյան Հայաստան այցելելու համար

Ամերիկայից, Եվրոպայից, Միջին Արևելքից ու Հայաստանից Դիարբեքիր, Վան, Կարս նահանգներ կատարվող այցելությունները կամուրջ են ստեղծում անցյալի ու ներկայի, նաև` ապագայի միջև:
Ինչպես տեղեկացնում է «Ակօս»-ը, այդ հեռավոր ճամփորդություններից մեկն իրականացրած ամերիկահայ Մեթյու Քարանյանը հրատարակել է իր «Պատմական Հայաստանը՝ 100 տարի անց» գիրքը:
100 տարի առաջ աշխարհի չորս կողմերը ցրված, սակայն անցյալն ու ցավալի հիշողությունը չմոռացած, իրենց մշակույթը պահպանելով՝ նոր կյանք ստեղծած շատ հայերի համար այն հողերը, որոնց վրա ապրել են, հուզմունք են առաջացնում. ոմանց համար վախ, ոմանց համար էլ հետաքրքրություն, սակայն շատերի համար դա անավարտ կարոտ է խորհրդանշում:
Վերջին տարիներին Արևմտյան Հայաստան այցելող ճանապարհորդական խմբերի թիվը բավական աճել է:
Երեկն ու այսօրը
Պատմական Արևմտյան Հայաստանի 6 նահանգները՝ Էրզրումը, Խարբերդը, Բիթլիսը, Տիգրանակերտն ու Սըվասը, ինչպես նաև Անին ու Կարսը, կարևոր կենտրոններ համարվող Սասունը, Երզնկան, Մուշը տեղ են գտել հեղինակի արած 125 լուսանկարներով ու քարտեզներով զարդարված գրքում՝ դառնալով այդ շրջաններ այցելել ցանկացողների համար ուղեցույց:
Գրքում ներկայացված են 100 տարի առաջվա կոթողներն ու դրանց ներկայիս տեսքը՝ ավերված:
Քարանյանը նշում է, թե 1915-ից հետո մշակութային կոթողների մեծ մասը կամ վերացվել է, կամ էլ սկսել է օգտագործվել այլ նպատակներով:
Գրքի առանձնահատկություններից մեկն էլ այն է, որ դրանում ներկայացված են նաև տեղեկություններ այն մասին, թե ուր և ինչպես կարող եք հասնել, ինչպես և որտեղ կարող եք անցկացնել ձեր յուրաքանչյուր օրը:
http://www.tert.am/am/news/2015/01/14/historic-armenia/1558527