Միջնադարյան զինվորներ՝ Էրդողանի պալատում

Հունվարի 12-ին Թուրքիայի նախագահ Ռեջեփ Թայիփ Էրդողանը նախագահական նոր նստավայրում՝ Աքսարայում, ընդունել էր Պաղեստինի ինքնավարության ղեկավար Մահմուդ Աբասին: Պաշտոնական արարողության ժամանակ ուշադրություն են գրավել երկու ղեկավարների թիկունքում գտնվող միջնադարյան ռազմական հանդերձով զինվորները:
Թե՛ մամուլի հրապարակումներում, թե՛ սոցիալական ցանցերում մարդիկ տարակուսանք էին հայտնել հրապարակված լուսանկարի իսկության շուրջ: Սակայն պաշտոնական գործակալության համբավ ունեցող Anadolu-ն փարատեց կասկածները: Ըստ աղբյուրի՝ աստիճանների երկու կողմերում կանգնած 16 զինվորները կրում են պատմության թատերաբեմում գոյություն ունեցած թյուրքական 16 պետությունների ռազմական հանդերձանքն ու զենքերը: Ուշագրավ է այն, որ Էրդողանը պաշտոնական արարողակարգի համաձայն անցնում է այդ շարքի միջով և դիմավորում հյուրին:
Bianet.org կայքն այս արարողակարգը համարել է դիմակահանդես, որոշ թուրք լրագրողներ էլ այն մեկ բառով անվանել են կրկես:
Սոցիալական ցանցերի օգտատերերից ոմանք ծիծաղելի են համարում Էրդողանի այս քայլը, ոմանք միջնադարյան ռազմական հագուստով զինվորների առկայությունը պայմանավորում են սոսկ Էրդողանի սուլթանական հակումներով և թուրքական անցյալի նկատմամբ կարոտաբաղձությամբ:
Bianet.org-ի հաղորդման համաձայն՝ թուրքական 16 պետություններն սկսվում են Հոնական կայսրությունից, ընդգրկում Լենկ Թեմուրի ստեղծած պետությունը և ավարտվում Օսմանյան կայսրությամբ: Որոշ պետական կազմավորումների թուրքական համարելը, մեղմ ասած, տարակուսելի է: Խոսքը հատկապես Լենկ Թեմուրի ստեղծած պետության մասին է, որը կռվում էր Օսմանյան սուլթանների դեմ:
Վերջին շրջանում՝ հատկապես նախագահ դառնալուց հետո, նկատվում է Էրդողանի աճող հետաքրքրությունը պատմական անցուդարձերի նկատմամբ, ինչի հետևանքով էլ նա ժամանակ առ ժամանակ աբսուրդ հայտարարություններ է անում: Դեռ շատերի հիշողության մեջ է նրա այն հայտարարությունը, թե Ամերիկա մայրցամաքը հայտնաբերել են մուսուլման ծովագնացները, ոչ թե Կոլումբոսը:
http://civilnet.am/2015/01/13/turkish-presidential-palace-erdogan-warriors-mahmud-abbas/#.VLYyVNKsV4I