Թուրքիայի ԱԳ նախարարն իր աջակցությունն է հայտնել թուրք ազգայնական Փերինչեքին

Թուրքիայի արտաքին գործերի նախարար Մևլութ Չավուշօղլուն հունվարի 9-ին հայտարարել է, որ ինքը կողմ է` «Դողու Փերինչեքն ընդդեմ Շվեյցարիայի» գործով հունվարի 28- ին Մարդու իրավունքների եվրոպական դատարանում (ՄԻԵԴ) կայանալիք դատալսմանը մասնակցի նաև գործով անցնող թուրք ազգայնական գործիչ Փերինչեքը` չնայած այն հանգամանքին, որ վերջինս իրավունք չունի լքել Թուրքիայի տարածքը. անցյալ տարի նա մեղավոր էր ճանաչվել հեղափոխության փորձ նախապատրաստող «Էրգենեքոնի» գործով և ըստ դատավճռի` ներկայում Թուրքիայից դուրս գալու իրավունք չունի:
2007թ. մարտի 9-ին թուրք ազգայնական գործիչ Դողու Փերինչեքը Շվեյցարիայի Վո կանտոնի դատարանի կողմից ենթարկվել էր ինչպես ֆինանսական, այնպես էլ քրեական պատասխանատվության Հայոց ցեղասպանությունը ժխտելու` այն «միջազգային սուտ» որակելու համար: Վո կանտոնի դատարանը և Դաշնային գերագույն դատարանը մերժել էին մարտի 9-ի դատավճռի դեմ ներկայացված բողոքը: 2013թ. դեկտեմբերի 17-ի իր որոշման մեջ ՄԻԵԴ-ի իրավասու պալատը որոշում էր կայացրել, ըստ որի՝ շվեյցարական դատարանի վճռով խախտվել է բողոքարկողի ինքնաարտահայտման ազատությունը: Այս որոշումը ողջունել էր Թուրքիան:
2014թ. հունիսի 2-ին Եվրոպական դատարանի հինգ դատավորներից բաղկացած կազմը կայացրել է գործի քննությունը ՄԻԵԴ-ի Մեծ պալատ ընդունելու մասին որոշում: Սա նշանակում է, որ դատարանի 17/12/2013թ. վճիռն ուժի մեջ չի մտնի: Մեծ պալատը գործը կվերաքննի հունվարի 28-ին:
Ինչպես հաղորդում է Today’s Zaman պարբերականը` ելույթ ունենալով դեսպանների տարեկան հավաքին` Թուրքիայի ԱԳ նախարարն ասել է, որ հեռախոսազրույց է ունեցել Փերինչեքի հետ և հույս ունի` քաղաքական գործիչը կկարողանա ներկա գտնվել հունվարի վերջին Ստրասբուրգում կայանալիք դատալսմանը:
Թուրքիայում Էրգենեքոնի աղմկահարույց գործով անցնող Դողու Փերինչեքը բանտից ազատվել է անցյալ տարվա մարտին, սակայն նրա` երկրից դուրս գալու արգելքը դեռ ուժի մեջ է:
Չավուշօղլուն ասել է, որ Փերինչեքի գործը շարունակում է վերաքննվել Թուրքիայի Վերաքննիչ դատարանում, և ինքը կարծում է` Փերինչեքը պետք է մասնակցի ստրասբուրգյան նիստին:
2013թ. սեպտեմբերին Հայաստանի Հանրապետությունը «Դողու Փերինչեքն ընդդեմ Շվեյցարիայի» գործով ներգրավվել է որպես երրորդ կողմ: Փերինչեքի գործով որպես երրորդ կողմ ներգրավվելու խնդրանքով ՄԻԵԴ-ում ՀՀ կառավարության լիազոր ներկայացուցիչ, գլխավոր դատախազ Գևորգ Կոստանյանը եվրադատարան էր դիմել 2013-ի օգոստոսի 20-ին: ՄԻԵԴ-ի Մեծ պալատը նույն տարվա սեպտեմբերի 20-ին հաստատել էր Հայաստանի մասնակցության հնարավորությունը:
Հունվարի 28-ին Ստրասբուրգում կայանալիք նիստին Հայաստանի շահերը կներկայացնի հոլիվուդյան հայտնի դերասան Ջորջ Քլունիի կինը` մեծ հեղինակություն վայելող փաստաբան Ամալ Քլունին:
«Դողու Փերինչեքն ընդդեմ Շվեյցարիայի» գործով որպես երրորդ կողմ ներգրավված է նաև Թուրքիան:
http://civilnet.am/2015/01/10/cavusoglu-statement-perincek-echr-january-28-hearing/#.VLOMANKsV4I