Ստամբուլում տարեց հայ կանանց վրա հարձակման գործով հերթական դատական նիստն է կայացել

Ստամբուլի ծանր քրեական հանցագործությունները քննող 2-րդ դատարանում տեղի է ունեցել Սամաթյա թաղամասում 2012 թվականին մի խումբ հայ տարեց կանանց վրա հարձակումների և նրանցից մեկի` Մարիցա Քյուչյուքի մահվան առնչությամբ հարուցված քրեական գործի 12-րդ դատական նիստը: Ինչպես հաղորդում է «Արմենպրես»-ը, այս մասին տեղեկացնում է թուրքական Demokrathaber.net-ը:
Դատական նիստին ներկա են եղել դիտորդներ Մարդու իրավունքների կազմակերպության Ստամբուլի մասնաճյուղի Խտրականության և ռասիզմի դեմ կոմիտեից և հայկական համայնքից: Հայտնի է դարձել, որ դատարանը դեռևս չի ստացել հանցագործություններ մեջ մեղադրվող Մուրադ Նազարյանից բացի մեկ այլ անձին պատկանող ԴՆԹ տվյալների վերլուծության արդյունքները:
Խոսքի իրավունք ստացած Բայծառ Միդիլլին` սպանված Մարիցա Քյուչյուքի դուստրը, ներկաների ուշադրությունը հրավիրել է այն փաստի վրա, որ հիմնական կասկածյալ Նազարյանին սպառնացել են, որպեսզի նա չխոսի: Նույնը, ըստ Բայծառի, արվել է նաև Նազարյանի ընտանիքի անդամների և մտերիմների հետ: «Ես ցանկանում եմ, որ հետաքննվի, թե ով է սպառնացել կասկածյալին, և ինչու նա չի խոսում»,- ասել է Բայծառ Միդիլլին:
Մեղադրյալի աթոռին հայտնված Մուրադ Նազարյանն իր խոսքում նշել է, որ չի ճանաչում իրեն և բարեկամներին սպառնացած մարդկանց: «Քանի որ չեմ հանդիպում բարեկամներիս, չգիտեմ` նրանց սպառնացել են, թե ոչ: Նամակ եմ գրում, բայց պատասխան չեմ ստանում»,- ասել է Նազարյանը:
Դատարանը որոշում է կայացրել քննության կանչել Նազարյանի բարեկամներին և նրանցից ցուցմունք վերցնել: Դատական որոշմամբ` Նազարյանը շարունակելու է մնալ բանտում և սպասել հաջորդ նիստին, որը կկայանա 2015 թվականի փետրվարի 17-ին:
Հանցագործը կամ հանցագործները չորս տարեց հայ կանանց վրա առաջին հարձակումը գործել են 2012 թ. դեկտեմբերի 27-ին` Թուրֆանդա Ա-ի նկատմամբ: Նրանք մտել են միայնակ կնոջ բնակարան, ծեծի ենթարկել նրան և տարել թանկարժեք զարդերը: Դեկտեմբերի 28-ին սպանել են Մարիցա Քյուչյուքին: Մեկ ամիս հետո` 2013 թ. հունվարի 22-ին, ներխուժել են 83-ամյա Սուլթան Այքարի տուն և նրան ծեծի ենթարկել: Փողոցում հարձակվել և փորձել են առևանգել ևս մեկ տարեց հայ կնոջ: Երկար հետաքննությունից հետո թուրքական ոստիկանությունը հարձակումների կասկածանքով ձերբակալել է հոգեկան խանգարումներ ունեցող ազգությամբ հայ Մուրադ Նազարյանին, ով հարցաքննության ժամանակ ասել է, որ չի ճանաչում այդ կանանցից ոչ մեկին և չի հիշում, որ նման սպանություն և հարձակումներ է կատարել:
http://www.tert.am/am/news/2014/12/26/istanbul-trial/1547085