Թուրքիան ու Ադրբեջանը համատեղելու են ջանքերը Հայոց ցեղասպանությունը ժխտելու համար

Ադրբեջանի արտգործնախարար Էլմար Մամեդյարովը տարեկան հաշվետու մամուլի ասուլիսին, ի թիվս այլ խնդիրների, անդրադարձել է նաև ղարաբաղյան հիմնախնդրին, Հայոց ցեղասպանության 100-ամյա տարելիցին և թուրք-ադրբեջանական համագործակցությանը վերաբերող հարցերին:
Ըստ թուրքական «Սոնդաքիքա» կայքի` Մամեդյարովը նշել է, որ Բաքվի օրակարգում չկա Եվրասիական տնտեսական միությանն անդամակցելու հարցը: Նախարարը ակնկալիք է հայտնել, որ Հայաստանի նկատմամբ պատժամիջոցներ կկիրառվեն, իսկ ԱՄՆ-ն էլ ջանքեր կներդնի Ղարաբաղի հարցի` Ադրբեջանի տարածքային ամբողջականության շրջանակներում լուծվելու համար: Լրագրողներից մեկի այն հարցին, թե արդյոք Ադրբեջանին առաջարկվել է մաս կազմել Եվրասիական տնտեսական միությանը, Մամեդյարովը պատասխանել է, թե Ղարաբաղի հարցն իրենց համար երբեք սակարկության առարկա չի կարող լինել: Իսկ Թուրքիայի հետ գործակցության մասով նախարարը հավաստիացրել է, թե շարունակելու են համատեղ պայքարել ցեղասպանության ճանաչմանը և դատապարտմանն ուղղված հայերի գործողությունների դեմ:
«Ադրբեջանի և Թուրքիայի արտգործնախարարությունները և դիվանագիտական համապատասխան ներկայացուցչությունները համատեղ աշխատանքներ են տանում հայերի ստերը մերկացնելու և իրական փաստարկված պատմությունը վեր հանելու համար»,-ասել է Մամեդյարովը:
Մամեդյարովը հիշեցրել է, որ վերոնշյալ խնդիրը կարևորել էին Թուրքիայի և Ադրբեջանի նախագահները սեպտեմբերին Բաքվում տված համատեղ ասուլիսի ժամանակ:
http://ermenihaber.am/?lang_id=2&news_=3&cur_news=2201