Ժամանակն է Հայոց ցեղասպանության հարցը տեղափոխել իրավական դաշտ. թուրքագետ

Հայոց ցեղասպանության 100-րդ տարելիցին ընդառաջ աշխարհի հայությունը պետք է ավելի ուժեղացնի աշխատանքներն այդ ոճրագործության միջազգային ճանաչման ու դատապարտման ուղղությամբ:

Այս հարցում թուրքագետ Ռուբեն Սաֆրաստյանը կարևորում է այն հանգամանքը, որ հարցի միջազգային ճանաչումից պետք է անցում կատարել դեպի իրավական դաշտ և իրավական տիրույթում ուծել Հայոց ցեղասպանության հարցը:

«Պետք է կյանքի կոչել «Պահանջում եմ և դատապարտում» կարգախոսը և այդ առումով ներգրավել նաև միջազգային իրավաբանների և, ստեղծելով խումբ, միջազգային դատարանում քննել Հայոց ցեղասպանության հարցը»,– «Արմենպրես»-ի հետ զրույցում ասել է նա։

«Պետք է կարողանանք մեր պահանջը մոտեցնել իրականությանը միջազգային իրավունքի տեսանկյունից: Պետք է ուժեղացնենք հետազոտական աշխատանքն այս բնագավառում և համատեղ հետազոտական աշխատանքի մեջ ներգրավենք արտասահմանցի առաջատար մասնագետների: Այս առումով բավական աշխատելու տեղ ունենք»,- ավելացրել է թուրքագետը։

Ռուբեն Սաֆրաստյանը նաև ասել է, որ միջազգային իրավունքի մասնագետները մեծ նշանակություն են տալիս հեղինակությունների տեսակետներին, և եթե «մենք կարողանանք ոլորտի հեղինակություններին ներկայացնել խնդրի էությունը, համոզված եղեք, որ բարենպաստ հող կստեղծվի իրավական դաշտում այս հարցի լուծման համար»:

«Այս աշխատանքը պետք է արվի, և պետք է պատրաստ լինենք երկարաժամկետ աշխատանքի: Մենք գործ ունենք Թուրքիայի հետ` երկրի, որը մեծ ռեսուրսներ է ներդնում այս հարցի դեմ պայքարում, բայց քանի որ ճշմարտությունը մեր կողմն է, մենք պետք է կարողանանք հասնել հաջողության»,- ասել է Սաֆրաստյանը:

Անդրադառնալով Հայոց ցեղասպանության միջազգային ճանաչման հարցին` Ռուբեն Սաֆրաստյանն ասել է, որ 2014թ. Հունաստանի խորհրդարանի կողմից Հայոց ցեղասպանության ժխտման քրեականացումը և Բոլիվիայի խորհրդարանի կողմից Հայոց ցեղասպանության ճանաչումը քայլեր են, որոնք Սփյուռքի և հայ դիվանագետների կատարած մեծ աշխատանքի արդյունքն են:

Ամփոփելով տարին հայ-թուրքական հարաբերությունների մասով` թուրքագետն ասել է, որ որևէ փոփոխություն չկա. թուրքական կողմի սկզբունքները մնացել են նույնը, պատճառները` նույնպես:

«Թուրքիայի քաղաքականությունը տասնամյակներ շարունակ մնում է նույնը, այն է` նախապայմաններ առաջադրել և Հայաստանի դիվանագիտությունը փոխել: Հայաստանը չի փոխում իր դիրքորոշումը, պետական քաղաքականության մեջ որևէ փոփոխություն չկա»,-նշել է Ռուբեն Սաֆրաստյանը:

http://www.tert.am/am/news/2014/12/22/Ruben-safrastyan/1542825