Պոլսո Հայոց պատրիարք Մեսրոպ Մութաֆյանի` առողջական վատ վիճակով պայմանավորված անգործունակությունը վերջին շրջանում Թուրքիայի հայ համայնքում պատճառ էր դարձել բուռն քննարկումների: Համայնքի մի շարք ներկայացուցիչներ սկսել էին բարձրացնել աթոռակից կամ նոր պատրիարք ընտրելու հարցը:
«Արմենպրես»-ը զրուցել է Ստամբուլում լույս տեսնող «Ժամանակ» հայկական պարբերականի գլխավոր խմբագիր Արա Գոչունյանի հետ` փորձելով պարզել Թուրքիայի հայկական համայնքի ներսում տեղի ունեցող գործողություններն ու հավանական զարգացումները:
«Պոլսո Հայոց պատրիարքական աթոռը Հայ առաքելական եկեղեցու ամբողջի մեջ ավելի քան հինգ հարյուր հիսուն տարվա անցյալ ունեցող կառույց է: Այդ հնության հանգամանքները խորհրդանշում են նաև վարչական ավանդույթներ: Թուրքիայի Հայոց պատրիարքությունը ունեցել է Ազգային սահմանադրություն, որը պատրիարքության ամբողջ վարչակազմակերպչական դրության համակարգի ակունքներում է»,– ասել է նա:
«Ճիշտ է, այսօր զանազան պատճառներով այդ Ազգային սահմանադրությունը պաշտոնապես չի գործադրվում, չի կիրառվում պետության վերաբերմունքի հետևանքով, բայց մենք՝ Թուրքիայի Հանրապետության քաղաքացիներս, մեր ներազգային, ներեկեղեցական կյանքը կազմակերպելիս այդ սահամանադրության ոգուց և տառից հեռանալու համար որևէ պատճառ չունենք»,- ավելացրել է Գոչունյանը` ներկայացնելով, որ Պոլսո պատրիարքարանի շուրջ 550 տարվա գոյության ընթացքում աթոռակից պատրիարքի կարգավիճակ երբևէ չի եղել:
«Մեր առաքելական եկեղեցու արդի պատմության մեջ այդ աթոռակցության դրությունը եղել է Մեծի Տանն Կիլիկիո կաթողիկոսության մեջ, և դրա հետևանքները մեզ ծանոթ են: Մեր եկեղեցու մեջ պառակտման միջավայր է ստեղծվել, հետևաբար իմաստ չունի, որ մենք էլ այդպիսի փորձառություն դնենք և կիրառենք մեզ մոտ»,- ընդգծել է Գոչունյանը` հավելելով, որ նման նոր իրավիճակը կարող է ռիսկային լինել Թուրքիայի հայկական փոքրամասնության համար:
«Պատրիարքական ընտրություն հնարավոր չէ անցկացնել առանց համայնքում ցնցումներ առաջացնելու: Իսկ մենք պետք է հաշվի առնենք` արդյոք այդ ցնցումը կբերի որևէ լավ բանի` լինելով չարյաց փոքրագույնը, թե ավելի լավ է մի փոքր էլ շարունակվի հիմիկվա դրությունը… Կարծում եմ, որ ներկայից վատ դրության մի փոքր ավելի շարունակվելն ավելի լավ կլինի, քան այժմ հայկական համայնքում ցնցումներ, պառակտումներ առաջացնելը: Բացի այդ, թուրքական ԶԼՄ-ներն անմիջապես սկսում են գրել, որ հայկական համայնքի մեջ այսպիսի պառակտում է առաջացել, հայերը չեն կարողանում համաձայնել պատրիարքի ընտրության հարցում և այլն, և այլն: Այսինքն, այդ ամենը պարզապես լրացուցիչ գլխացավանք կառաջացնի թուրքական հասարակության աչքի առաջ»,- ասել «Ժամանակ» պարբերականի խմբագիրը:
http://www.tert.am/am/news/2014/12/22/gochunyan/1542840

Պոլսո Հայոց նոր պատրիարք ընտրելու դեպքում Ստամբուլի հայ համայնքում ցնցումներ կառաջանան. Արա Գոչունյան
•
Leave a Reply