Ալփեր Թան. ««Արաբական գարունը» Թուրքիային հեռացրել է ՆԱՏՕ-ից ու ԱՄՆ-ից»

Թուրքական «Kanal A» լրատվական գործակալության խմբագրապետ Ալփեր Թանը իր հեղինակային «Քաղաքացիական մտորումներ» հաղորդման շրջանակներում անդրադարձել է ռուս-թուրքական հարաբերություններին ու դրանց օրակարգում ընդգրկված տարածաշրջանային խնդիրներին:

Վերջինս նշել է, որ Թուրքիայի ու Ռուսաստանի միջև մի շարք խնդիրներ կան, որոնց մի մասը կարող է լուծվել Ռուսաստանի, մյուս մասն էլ` Թուրքիայի աջակցությամբ:

Թանը նշել է, որ Սիրիայի ու Ղարաբաղի հարցերում Թուրքիան ցանկանում է ինչ-որ բան անել, սակայն չի ստանում Ռուսաստանի աջակցությունը: Թանի կարծիքով, եթե Ռուսաստանը Ղարաբաղի ու Սիրիայի հարցերում աջակցի թուրքական թեզերին, ապա այդ խնդիրները ավելի հեշտ կգտնեն իրենց լուծումը: Վերջինս նշել է, որ Թուրքիան Չեչնիայի, Ղրիմի և Ուկրաինայի հարցերում իր աջակցությունը ցուցաբերելով Ռուսաստանին, կարող է նպաստել հարցերի լուծմանը: Ռուսաստանն էլ, օգտագործելով Չինաստանի հետ ունեցած իր հարաբերությունները, կարող է որպես միջնորդ հանդես գալ «Արևելյան Թուրքիստանի» հարցում: Թուրք հայտնի լրագրողի կարծիքով սառը պատերազմի ժամանակվա հավասարակշռությունը արագորեն փոխվելու միտումներ է դրսևորում:

Ալփեր Թանը նշելով, որ «արաբական գարունը» Թուրքիային հեռացրել է ՆԱՏՕ-ից ու ԱՄՆ-ից, ասել է. «Նոր կարգերի փնտրտուք կա: Նոր ստատուս-քվոյի ձևավորման միտում կա: Նախկինում կային Վարշավան ու ՆԱՏՕ-ն: Այժմ դրանք արդեն կորցրել են կենսունակությունը, ու անպես է երևում , որ մի նոր համակարգ է ստեղծվելու: Արևմուտքը համաձայնության է եկել Իրանի հետ, որին դեռ անցած տարի սատանա էր անվանում: Արևմուտքը կարող է ձեռքից եկածը անել Ռուսաստանին իր կողմը քաշելու համար կամ էլ Թուրքիային գայթակղիչ առաջարկություններ անել»:

http://ermenihaber.am/?lang_id=2&news_=4&cur_news=2027